球迷都以為艾殊利高爾同加拿斯嘅交易，令一切恩怨畫上句號，但車仔喺周一突發聲明數臭加拿斯，大爆後者曾經好啜核咁話，如果焗佢出場，佢就以烏龍波同紅牌來「答謝」各位，唔到你唔服！
我求大俠為球迷着想，落咗好多心機睇咗車仔嘅冗長聲明，內容大概就指出加拿斯「4宗罪」：第1，上季車仔諗住同加拿斯搞續約，點知佢大聲夾冇準話想要新挑戰，唔止唔續約，仲拒絕喺足總盃4強鬥利物浦時披甲，威脅必須加薪；第2，本來加拿斯應承咗世界盃後嘅歸隊日期，但佢又無履行自己口頭承諾。
4宗罪要脅轉會他投
第3，加拿斯雖然冇隨隊去美國，但摩連奴之後卑躬屈膝咁叫佢番車仔大家庭，希望佢回心轉意，點知佢噴到摩連奴一面屁；第4，車仔聯賽首戰鬥曼城，球隊得番4個後衞，泰利仲帶傷頂硬上，加拿斯竟然扭擰唔想落場，仲話會以「烏龍波」、甚至迫令球證趕自己出場，嚟「報答」要佢落場嘅指令。
講到呢度，如果你係領隊，都忍唔到加拿斯啦，所以車仔就將佢送去阿仙奴！加拿斯亦喺之後發表聲明話自己冇咁講過，仲話車仔今次嘅行為好冇品㖭！佢話：「我從來都冇講過要專登擺烏龍，但我決意要離隊就係事實。我覺得今次事件係有人唔肯向自己嘅球迷負責！」
我求大俠闖蕩球壇咁多年，都好少見到球會賣咗人之後仲噏一輪嘢，雖然加拿斯係做錯㗎喇，車仔亦無謂喺呢個錯誤上踩多一腳，搞到自己無晒勁旅風範就無謂啦！