近年香港影視娛樂事業吹淡風，演藝界都指望內地開放市場，不過內地一向好排斥港產片同香港藝人，驚佢哋爭飯碗，所以之前定咗好多保護條例，好似合作拍片或者劇集都規定只有五個非內地人嘅配額，呢個配額仲包括埋工作人員。
開放廣東省
話雖如此，不過𠵱家都有唔少港星向北望，好似楊千嬅咁，早排喺內地以高價15萬港元一集接拍內地劇《武十郎》。由出年1月1號開始，內地會放寬電視劇製作規定，香港藝人拍劇唔會列入配額制，如果以後內地劇冇配額限制，港星會更加吃香。
噚日千嬅知道呢件事，好開心咁話：「如果以後冇咗配額制，咁香港藝人肯定會有更多拍內地劇機會，對香港演員嚟講梗係好事。」
除咗劇集之外，國家電影局仲研究緊只准戲院用半年時間嚟放映外語片，以保障華語片利益，但戲院商都好反對咁做。
不過香港影協主席洪祖星日前同馮仁昭講，話中央會開放廣東區畀港產片上映，因為𠵱家所有戲喺內地放映都要係合拍先可以上到，但明年初開始，港產片只要通過內地電檢，咁就可以用番廣東話版本喺廣東區放映喇。廣東人口唔少，山大斬埋有柴，應該對港產片票房有唔少貢獻啦！
