以90年代發迹嘅RPG嚟講，《Tales》系列都算係手執牛耳之選，單論藤島康介人設、靚到飛起嘅動畫同埋只此一家全動作戰鬥，就足已同《FF》、《DQ》分庭抗禮！如今PSP大熱當前，推出當年令唔少人「嘩」聲四起嘅第一集重製版，咪以為廠方求其「翻叮」冷飯畀人食，查實係配上全語音嘅極級Upgrade，就算唔太鍾意RPG，都可當佢卡通片嚟睇！
文：陳福榮
Namco撐盡PSP，唔計九月尾推出嘅《RidgeRacers2》，月頭都有呢隻RPG大作《TalesofPhantasia:FullVoiceEdition》（下簡TOP）見街，食住之前《TOE》嘅好評相信同樣會受到追捧。叫得做全語音版，固然係做到近乎每句對白都有配音咁誇張，換言之大家煲Game儲Level時，睇埋角色聲畫演出，就好似享受緊套精采動畫一樣！
新要素方面，為咗令之前玩爆過超任、PS甚至GBA版嘅人有衝動再玩多次，製作人員特別增設專為二周目（爆機後玩第二次）而設嘅GradeShop，等人可以將首循環拎到嘅獎分買啲騎呢嘢，帶落二周目度咁就玩得更開心。
畫面演繹徹底進化
即使元祖版《TOP》喺超任稱得上頂級畫功，嚟到PS世代都顯得有點過時，所以嗰陣PS版俾人鬧過做得求其，滿足唔到班忠實擁躉。今次佢就用咗舊年PSP版《TOE》個引擎再加以強化，平時啲村莊同迷宮嘅「雕花」程度已超越前作好多，而空中飛行場面則因有強勁3D機能幫助，變成冇狗牙滑溜到痹。鑑於唔少機迷都係由《TOD》先開始接觸《Tales》系列，望見𠵱家啲畫面應該唔會大嗌「玩唔落手」啦！至少都畀吓面佢係《我的女神》個作者藤島康介擔任人設啩！
上次PSP推出《TOE》，儘管係翻出作仍有唔少人讚賞有加，話佢個闊螢幕夠Sharp睇得非常清楚，但最緊要嘅都係畫面比例擴大，令極需要空間走動嘅戰鬥部份變得爽快無比！呢隻全語音版繼承咗有關優勢，盡量將敵我雙方數據資料有咁細整咁細，以騰出更多空間畀玩家跟怪物互抽。同樣地大畫面另一好處就係出招臨場感勁好多，再唔係雷聲小、雨點更小！為咗享受到精采絕倫嘅配音效果，大家記得插住耳筒嚟大大聲玩呀，事關嘈親人係好缺德㗎！
《TOP》不為人知的秘密
正所謂「一將功成萬骨枯」，如今《Tales》大行其道，但原來曾陷入胎死腹中邊緣。話說負責超任版《TOP》嘅外判製作小組，因與當時投資者Namco意見分歧，廠方希望將嗰個近乎完成嘅版本大改兼勁加內容，結果部份骨幹成員一怒之下拉隊走，另起爐灶Tri-Ace幫Enix（現SquareEnix）整咗隻《StarOcean》。最後《TOP》由剩番唔走嘅開發組員執手尾，幸好出到嚟唔算失禮，形成兩個風格頗似嘅系列存在Game界，直至現在。
聲優迷力撐 淨聽森川已值回票價！
既然呢隻重製版《TOP》以大量配音作賣點，不如搵個對聲優行情非常熟識嘅業界人士，講吓佢同以前幾個版本嘅主要分別喺邊？
「以前超任版淨得戰鬥同部份過場有配音，仲因為容量關係搞到把聲拆晒，而之後響PS翻出亦唔見得好好多，所似作為《Tales》開山老祖作品，點都係有啲失敗。今次新版除咗6大主角有勁多配音及執番晒靚聲外，就連路人甲、乙都搵嚟諸如結城比呂、田中理惠呢啲一線聲優，再加埋搵咗近期人氣急升嘅森川智之配最後大佬，論卡士絕對拍得住原本嗰位因意外逝世嘅鹽澤兼人，咪話之前玩過吖，淨係呢個聲優陣容已經夠殺。」
PROFILE
遊戲類型：RPG
對應機種：PSP
遊玩人數：1人
開發廠商：Namco Bandai
行貨售價：$279
(C)藤島康介
(C)1994-2006NAMCOBANDAI
佛山讚先生
等咗多年，終於將《Tales》首作Remake，加入全語音並非「揸流」之作，你諗吓一隻RPG有超大量對白，仲要搵嚟咁多名牌聲優，使費一定唔少，抵撐！
百彈賤腦男
自從Namco搭上Bandai後，真係感染咗「笨呆」嘅搶錢功架，呢兩年《Talesof》美其名十周年，大堆續作、外傳、多機種版本爭相出籠，簡直就係「機戰版《Tales》」，該煨！
