星期日，馬主H到沙田馬場參加馬主嘉年華會，首先到凱旋廳飲茶，將近三點先至行去沙圈及會員棚，只見外面嘅吐露港公路去獅子山、沙田火車站方向大塞車，據探子報告，由一千米入閘處（體藝中學）塞到去中文大學，原因不明，大家諗住馬場嘅嘉年華會散場後，外面塞完車啦，返香港九龍唔會有阻滯，點知運輸署，警察方面，冇人理喎，一路塞到晚上八點後，究竟搞邊科呀，九月十日馬季開鑼，如果歷史重演，馬會多得佢唔少。
醒目識路馬主離開之時，就唔會沿吐露港公路出九龍，會識得喺沙圈外馬路圈頭沿斜路上大埔道/九肚山方向，一係走番落吐露港公路向大埔方向，駛向馬鞍山大橋轉入通往大老山或獅子山隧道之快速公路，二係轉入樂景街去火炭往火車站轉左，出咗火炭直上獅子山，完全避開晒塞車。但星期日下午，自新界北出嚟之巴士、貨櫃車、私家車源源不絕，係咁南行走入吐露港公路，轉唔到彎。如果警察交通部、運輸署監察站早啲通知電台宣揚，應該可以減少塞車。
講番嘉年華會，馬主H都係第一次參加啫。嘩，馬會好闊佬噃，場內飲品任飲，自助餐式小食任食，又有紅酒、白酒、香檳任人試飲，擺咗近百張餐枱任坐，沙圈有各款小童遊戲，看台外凱旋門有小馬俾小童騎，好玩到極，大馬主SirPaul捧住一大杯爆穀，一隻小椰青，食得好快樂。馬主H走埋去叫佢一聲SirPaul，佢立即停口，叫馬主H唔好SirSir聲，稱呼叫做馬主K就得嘞。馬主K乘機大吐苦水，話上季自己加埋個女，一共養咗幾隻馬，一次頭馬都未贏過，輸到冇眼睇。馬主H話預先恭喜佢今季贏番有突，拉番十次八次頭馬。𠵱家就食番馬會一大餐先！馬主K大笑：「食幾多杯爆穀先至夠。」
馬會驚馬主年老化（見星期日《蘋果》馬經版），要成立一個「競駿會」，招攬一啲年輕非會員夾份做馬主。呢條蹺唔知得唔得。如果啲馬主人人效法馬主K，馬會就唔會頭痛啦。馬主K好支持女兒做馬主，趙世光都係，馬會不如搵佢哋做馬主年輕化代言人。