嗱，唔係話你貪心，不過有邊個食自助餐唔係左手一大碟右手一大碗，一餐頂三餐先㗎？講到尾咪因為「限時」兩個字囉！食半粒鐘停手同食兩粒鐘先停手都係畀咁多，無理由蝕畀佢㗎！不過今次有人蝕番畀你，有食肆推出素食自助餐，午市幫襯擺低$50任食6粒鐘，雖則唔少香港人都係食肉獸，但咁嘅價錢，食少一餐肉又點話啫。
記者：黃若茵 攝影：譚盈傑
模特兒：Christy、Peggy、Pakho
辣味開胃精選
素豬耳：味道酸辣，開胃精選，爽脆口感真係呃得吓人，以為真係食緊肉。
街坊睥睥貢
海鮮精選
素蝦沙律：肉汁豐富，食到陣陣黑椒香味，不過肉質無真蝦咁彈牙，結實咗啲。
米飯精選
番茄釀野米：賣相同色彩都好吸引，野米煮得腍口，食落感覺好健康。
傳統素食
香草油浸有機豆腐：有機豆腐成本高，不過食起嚟唔夠滑身，好彩加咗香草欖油，味道加分。
雞鴨精選
香酥素鴨拼薄餅：薄餅捲素鴨肉、青瓜絲、甘笋絲，口感有爽有腍，層次豐富。
小吃精選
素海蜇：賣相靚，似足真海蜇咁晶瑩剔透，味道帶少少辣，係唔錯嘅開胃小食。
台式醬料精選
冬菇XO醬：辣得嚟較鹹，而菇粒極為香口，淨食個醬都已經好好味。
推廣素食 不計成本
「TAI極之素」新開張1個月，自助午餐每位$50可以由12:00nn食到6:00pm，自助晚餐每位$60就食到尾，抵食到有啲驚。經理Poko話：「我哋推廣素食，香港人偏向鍾意食肉，素食者唔多，個素食Buffet，符合𠵱家嘅健康飲食潮流。」我有啲懷疑，係咪因為素食成本低就所以咁平？「素食唔同平時去街市買菜，成本都好高㗎，素肉都仲可以大量入貨，但蔬菜一定要新鮮，無得入定貨，我哋仲盡可能揀有機菜，成本一啲都唔平㗎。」
素肉口感 勁似真肉
開張短短1個月，以低價作招徠睇嚟相當成功，午飯時段可以坐滿半間舖，晚市更加係大排長龍，不過要吸引顧客食素，唔係一味平就可以，食物款式多同質素都好重要，Poko話：「師傅炮製多元化菜式，行嘅路線同傳統素食店唔同，由中西日到東南亞口味都有，唔再係甚麼素鵝、素雞、麵筋咁悶。因為香港人鍾意食肉，所以我哋啲素肉口感做到好真實㗎。」試過，真係要拍手掌，估唔到黃豆、蒟蒻呢類簡單食材，都可以有咁多變化，食素肉反而比真肉更有新鮮感。
食客有Say
間舖有幅超大落地玻璃，食物就放喺大玻璃前面，對正出面大街任睇唔嬲，唔少街坊經過都眼昅昅、裝裝貢。啱嘅，眼見為實嘛，Show埋畀人睇就最公道，睇啱先入嚟幫襯囉。
TAI極之素（28911857）
地址：銅鑼灣謝斐道482號（近信和廣場）
營業時間：12:00nn-10:30pm
交通：銅鑼灣地鐵站B出口
座位：60個
收費：自助午餐（12:00nn-6:00pm）每位$50，自助晚餐（6:00pm-10:30pm）每位$60
