前年憑住發明有防盜功能嘅機械人，而奪得國際科技大獎嘅本港「土產」小小發明家陳易希，雖然喺會考只考到12分，但獲得科大破格取錄已成定局，噚日開學第一日，易希話入大學係一個好嘅新開始，自己充滿住期待。
八方見佢滿面暗瘡，一問之下，先知佢今年6月遠赴花旗國做兩個月火星探究工作嗰陣，為咗慳錢而日日捱美式漢堡包，食到啲暗瘡爆晒出嚟，嗰時仲好忙好辛苦，連買嘢嘅時間都欠奉。
易希話，新學年佢會修讀數學、基礎物理、電子、英文同埋微型中央處理系統五科，雖然會考英文唔及格，但佢一啲都唔擔心英文應付唔嚟，佢話讀工程好多都係符號嚟，唔使驚。
𠵱家易希已經收拾好心情，上個禮拜仲返大陸買咗啲電子零件，準備繼續研究工作。佢仲話，自己已經見過好多個科大同學仔，識咗好多新朋友，仲做晒friend啦。