近期樓市有起色，元朗加州花園亦好景，8月有11宗成交，遠多於7月的兩宗。難得市況好，炒家也捉緊時機出貨甩身。有個投資者，今年4月買入翠松徑雙數屋，10月到期要上會，所餘日子無多，就趁呢排個市好，有客睇啱，便快快摸出件貨，成交價648萬，賺32萬，開開心心離場去。
美聯呂偉雄講，間屋2021呎，有500幾呎花園，望米埔，係優質盤，所以個換樓客一睇合心水，都唔介意係摸貨。
另外，柳樹徑單數屋個炒家就無咁好彩，要蝕讓。話說佢舊年6月用398.5萬買入，成交期9個月，但無人接貨，於是搵業主傾，加錢再延期半年，到9月成交，所餘時間少之又少，近日有客睇中，於是平平地以388萬元賣出，賬面蝕10.5萬元。不過，連埋釐印、佣金，畀業主補償費，差不多蝕40萬。
呂偉雄話，加州花園雖然曾經係炒家天堂，但好耐無出現摸貨轉讓，以上兩宗係今年首次出現。不過，現時以用家主導，未來市況會健康發展，樓價較平穩。
電郵地址：[email protected]