澳門賭博業競爭大，搞到有賭王之稱嘅何鴻燊都要諗計拉客，條橋竟然係凡喺拱北關閘及港澳碼頭乘坐澳博新幹線接駁巴士、持即日噴射飛航船票尾旅客，前往葡京或回力娛樂場即送1客叉燒飯加$20娛樂消費券。呢條橋引起大批網民討論，不過就彈多過讚，有9成人好唔畀面，認為係「愚蠢方法，真係過氣賭王！」網友faihim話︰「人地（哋）嚟賭錢㗎，你估個個係啲阿毛（婆）要貪你盒叉燒飯咩。」我同威草莓意見差唔多︰「呢個係sellingpoint嚟，都唔錯。雖然好似cheap左（咗）啲，但係會有個話題講吓，好過咩都唔做。」有話題即係有人講，何鴻燊已經成功咗一半，何況一碗靚叉燒飯絕對唔失禮，你睇龍門酒樓同鏞記兩間老店，開業半個世紀有多，叉燒飯依然係一眾食客至愛就知啦。
網址︰ http://www9.discuss.com.hk/viewthread.php?tid=2226725&extra=page%3D1