威過郎朗嘅10歲鋼琴神童沈靖韜，返咗香港之後幾乎冇停過，除咗要應酬一班親朋戚友同四圍演奏，又要預備一大堆暑期作業，噚日返學仲要彈琴表演畀一班師兄師弟聽，一場接一場，去完新小拔（拔萃男書院附屬小學）再去埋中學嘅男拔，認真唔得閒。
唔知係咪太過忙，一向品學兼優嘅小靖韜噚日唔記得咗交功課。事緣校長見佢揚威德國埃特林根國際青少年鋼琴比賽，獲獎時年齡仲細過當年嘅郎朗，咁威，梗係要小靖韜寫番篇文章，講吓自己獲獎心情同彈琴心得，然後裱起篇文畀其他師兄弟分享。但小靖韜同沈媽媽可能呢排太忙太興奮，完全冇咗件事，沈媽媽要等到噚日清晨五點先省起，自然唔忍心叫醒乖仔趕功課，惟有做一次壞學生咁多，遲交功課一次，呢個禮拜五補番。
小靖韜噚日喺學校早會彈咗幾首歌，又即席自彈自作，聽到一班師兄弟如癡如醉，拍爛手掌。佢話為咗呢場表演，之前一晚練琴三個半鐘。唔好睇佢年紀細細，原來已經有幾首得意之作，名字分別係「One」、「3X」、「Naughtymonkey」、「ThedaywhyC,D,F#,G#wentpsycho」……唔好問啲名點解，因為小靖韜都唔知，總之鍾意咪改啲咁嘅名，藝術家真係藝術家。
表演完畢，男拔校長張灼祥即刻拎六萬大元「報酬」畀小靖韜。大家唔好誤會，其實筆錢係小靖韜未來兩年嘅獎學金，表揚佢為港為校爭光，最開心相信都係沈媽媽，因為嚟緊小靖韜兩年學費每年都唔使一萬蚊。
唔好睇小靖韜斯斯文文，佢噚日就自爆自己原來好多嘴，而且操行最差試過攞C+（沈媽媽即刻糾正話只係B-），不過佢後尾都兜番，自己呢一刻最想都係讀好啲書，成績可以再好啲，又即場表演錫細佬，錫到啜啜聲，冧到沈媽媽鬼咁開心。
記者：梁美寶
攝影：孔慶初