招商銀行就快招股，聽投資C講，招商銀行係好股，申請新股冇蝕底。佢話招商銀行嘅科技系統在內地算係比較先進，注重零售業務，既進取，又冇乜大風險，總之就係正。
左丁山問：「點解招商銀行冇乜大風險？」分析師Eric搶答：「因為總部在深圳。」唔明喎，總部在深圳與總部在上海有乜分別？投資C咭咭笑咁講：「你知啦，喺上海或北京，容易見到大人物，收到大人物電話，一有柯打，就要承造政策性貸款，借錢畀蝕本項目或國有企業或大人物有關係嘅企業。呢類貸款風險無可估計，總部位於深圳咯喎，正是山高皇帝遠，耳根樂於清靜，少啲遇到大人物，銀行行新政唔會碰上打橫嚟嘅阻力。」
哦，明白晒。少啲干預，多啲發達。投資C與Eric預料招商銀行會有好多倍超額認購，投資C吩咐佢嘅私人銀行家盡攞新股，左丁山話：「就算盡攞，咪得幾萬股，冇乜肉食，我申請呢啲股，夠運嘅分到一千，唔夠運就得個零雞蛋，蝕埋皮費，呢次唔申請咯，費事麻煩。」
分析銀行好壞，憑表面印象當然唔可以話唔啱，其實需要深入分析數據，找出「駱駝評級」，先至信得過，只可惜「駱駝評級」係絕對機密，只有金管局與銀行先至知道，外間投資者與消費者完全唔知。何謂「駱駝」呢，就係CAMEL，每個字母代表一項評估準則：
C：CapitalAdequacyRatio資本充足比率
A：Assetquality資產質素
M：Management管理
E：Earnings利潤
L：Liquidity流動性資金
香港本地銀行嘅「駱駝評級」分一、二、三共三級，一級最好，賓架陳以前話過畀左丁山聽，銀行最好保持在二級，因為維持一級太辛苦，攞三級會失威。左丁山問佢間銀行係第幾級，佢話：「死都唔話畀你聽！」