搭建一個約3米高的工作台,要幾多時間呢?答案係1分鐘。拆呢?亦係1分鐘。
愈來愈注重品牌及推廣嘅滙豐銀行,噚日喺中環總行搞咗場show,請來一班雜技演員載歌載舞,為其工商業務新環球廣告系列拉開序幕。
呢班演員大部份造型係地盤工人,其中一位扮芭蕾舞蹈員,喺大約1分鐘時間內,用鐵架接合成兩個約高3米嘅工作台,然後喺工作台上及地面表演,喺滙豐總行地下廣場又唱又跳,十分熱鬧。駐總行各部門高層都有出席支持,而邵銘高及梁高美懿仲同一齊上台客串玩埋一份(圖)。
臨近表演尾聲,呢班演員行動迅速地將工作台拆卸,呢種雷厲風行嘅行動家作風,正合集團行政總裁紀勤意思。
李潤芳攝