後生仔女要行街買嘢，總離不開旺角、尖沙嘴和銅鑼灣，但原來螢幕情侶檔李逸朗（Don）和蔣雅文（Mandy）入行後，閒時仍然鍾意逛旺角！平日他們穿着的衫褲鞋襪都有Sponsor，咁咪即係唔使點使錢？錯！一到旺角，佢哋荷包就立即進入緊張狀態，開始為自己的心頭好而「戰」！第一站，先去旺角探Mandy囡囡先！
記者：黎婉薇
攝影：陳偉強
衝去買「囡囡」衫
與沒有玩開玩具的朋友提起兆萬商場，他們未必知道裏面有乜賣。但喜歡玩具的Mandy，兆萬就成為她到旺角必到的商場。Mandy：「其實我對好多玩具都有興趣，例如Figure公仔和菓子玩具等，菓子玩具仲會一套套買齊佢，因為我明知唔會抽得齊囉！但講到最想買的玩具，都係SuperDollfie。SuperDollfie的造型好像真人，而且手工好，但一隻SuperDollfie講緊幾千蚊，我真係唔捨得買！雖然我無SuperDollfie，但來到這個商場，總會去看看專為大頭妹Blythe公仔做衫的舖頭，欣賞一下人哋囡囡的百變可愛造型！等我將來擁有SuperDollfie的時候，就可以跟着做一些有特色的衫畀佢哋！」
小記聽到Mandy話鍾意SuperDollfie都有點意外，因為呢類型的公仔真係唔係人人接受到。點知聽Mandy再補充說：「我自己一直都好鍾意啲帶點恐怖和神秘造型的公仔，但媽咪就係唔鍾意我把呢啲恐怖公仔放在房裏面，佢話一對對咁恐怖的公仔望住我唔多好喎！」Don：「講真，好多男仔都唔明白點解呢啲公仔會咁吸引女仔，但我都幾欣賞公仔千變萬化的造型，有時又真係幾過癮！佩服師傅可以做到咁似真人的裝束。」
B女Twins！
阿Don和Mandy見到呢一對B女，就立即好有默契咁話：「哈哈……左邊係阿嬌，右邊係阿Sa呀！」睇睇吓又幾似喎！
（左）水手裝連身短裙連帽$148
（右）水手裝連身褲連帽$238
Mandy教湊女換衫
地址：BHC（23849907）
兆萬商場地庫B209室
揀錶！兩個都愛金錶
Don：「其實早排在偶然機會下見到隻金色的手錶，覺得好有型，而自己又未買過，咁咪想睇睇有無啱心水囉！我唔係要『金勞』，由於金錶本身真係好誇張，而且又唔係咁易襯衫，所以要我揀，我都係想揀Casual同型仔啲嘅款式，又或者跳字錶咁啦，唔會帶到個人太老成！」
Mandy：「我都係！我本身都有隻金色跳字錶，到𠵱家我都仲有戴，隻錶其實有段古，有一次出Trip時，我唔小心唔見咗隻由小學帶到大的銀色跳字錶，好心痛！但由於錶款已經停產，所以我一班好朋友便送了現在的金色跳字錶畀我，好感動！所以𠵱家我只會無工作在身的時候先戴錶，一來怕唔見咗隻錶，二來怕整花錶面！」
精選靚錶
地址：MidpointTimeCompany（21366838）
潮流特區一樓25-26號舖
做潮人就要「執書」
Don：「由於唔係成日有時間嚟旺角，所以一到就會睇睇最新出的日本雜誌和漫畫，Update吓自己！最多年輕人睇的，一定係日本的時裝雜誌。好羨慕日本人可以着得咁有型，真係要睇多啲學多啲。除了時裝雜誌，日本出的興趣書都好專業，就好似呢本書咁，主要講2006推出過的模型車，咩比例的車都有，顏色十分豐富，十分吸引。我自小就好喜歡ClassicMini，覺得好可愛，所以細細個就已經開始留意有關Mini車的資料，希望終有一日可以擁有一架！」
Mandy迷相機最愛Lomo
「我就鍾意相機，不過係古董相機！想買有關嘅書都係要搵日本出版的好，看到一幅幅圖片已經滿足晒！古董相機本身好精緻，雖然未必用到，但都試過上網Bid，千里迢迢運來，收到時心情真是很興奮！用得最多的相機一定係Lomo。我比較喜歡用菲林相機，影出來感覺不同。數碼相機則用作記錄生活細節，方便Update自己Blog。儲存在電腦的相片，我又會用Photoshop把相片合成出不同效果，過程很滿足！」
Mandy力薦3大正書！
地址：買物王（21360103）
潮流特區地庫B12室
Fans跟住過場！
Don和Mandy在旺角周圍走，行蹤就當然俾Fans知道啦！一離開商場，就有一大班Fans在門口等候，閃光燈閃個不停，人群愈圍愈大，阻塞住商場門口，似乎佢哋行街都係要考慮分頭行事！
佢哋好不容易才離開兆萬，打算走過隔籬的潮流特區，原來Fans已經從後跟上一齊過場，盡量把握可以同偶像影相的機會！
同Fans影完相，Don和Mandy一支箭標到一樓的錶舖，手指指櫥窗內的手錶，似乎佢哋今次都係有目標而來的！
