地產代理後勤員工經常要去樓盤支援前線𢱑生意，非常辛苦，但係前線做到成交，後勤就冇得分，真係得個做字；因此，中原定下目標，只要每個月生意額達標，就向後勤派利是。8月份住宅部生意超過1.6億，所以向每個後勤派800蚊利是，都夠食餐勁嘅。今年3月同7月，中記都因生意好而派利是，但每次都係得三嚿水，今次係咪賺得勁啲，所以派多啲呢？
講開中記，總舵主施永青上個禮拜六同工商部同事搞個分享會，題目係「宏觀看樓市前景」，有250人出席。
施生話，作為地產代理要有博學心態，除咗要了解地產市道，仲要對世界大事，以至對政治亦要有啲認識。
另外，施生又大談對工商舖嘅睇法，佢形容舖位市場嘅走勢係先見喜瑪拉雅山，再見青藏高原。對於整體樓市，佢擔心發展商嘅銷售方法，故一手市場現時嘅活躍氣氛未能持續至年底，但預料至07年下半年，樓市將會好轉。