賭王何鴻燊都話︰「中國人廚房全世界最熱，但煮食係最好。」講咁多嘢最啱呢次喇，煮得好，皆因烹調招數多不勝數，煎、炒、煮、炸、燜、燉、煲……N咁多種煮法，真係無番咁上下功力，無番十年八載揸鑊鏟經驗，都咪使旨意踏入中國人廚房半步。今日介紹7道鮑魚菜，最掂係用上湯浸20秒嘅堂灼做法，因為最能鎖住鮑魚鮮味。
記者︰方綺君 攝影︰黃子偉
鮑魚營養高
鮑魚被喻為「海洋的珍珠」，係海味四寶之首，含豐富蛋白質、鐵、鎂、鉀、維他命B，多食好補，「龍苑中菜廳」總廚佳哥話︰「鮑魚有平肝、養陰、固腎功效，最啱你哋成班日做夜做，做到四肢無力，精神又難集中嘅上班族食喇。」今次鮑魚宴，用嘅係澳洲同南非罐頭鮑魚，配料就用名貴魚翅、花膠，靚料有齊，點煮先？「保持神秘，煮出嚟你就知。」唓，懶巴閉，咪又係離唔開扣、切片炒諸如此類？佳哥帶我入廚房參觀，見佢切片、打芡、拋鑊，無幾耐就完成7個菜式。數一數，居然有齊清蒸、堂灼、炒、捲、扒、扣、撈7種做法，厲害。我細細聲講︰「咁快可以做好，工夫唔慌多得去邊。」點知佳哥咁好耳，即刻糾正話︰「當然唔係啦，啲罐頭鮑一運到嚟，要做足4個程序先用得㗎，首先要洗亁淨，用鬆肉粉開水醃一晚，之後連水蒸鮑魚5小時。第三重工夫係啤水1小時，再沖水1小時，最後用老雞、火腿、豬皮、豬肉等加調味煲8小時，好多事前工夫你睇唔到咋。」
1.鮑魚絲瑤柱菇絲扒節瓜甫$98
原個節瓜同蝦米一齊煲，再扒鮑魚絲、瑤柱同菇絲，佳哥︰「芡汁最重要，太濃太稀都會影響口感。」
2.桂花炒鮑魚絲海虎翅$280
鮑魚絲加海虎翅同雞蛋一齊炒，翅針夠粗特別爽口，炒蛋嫩滑鮑魚絲鮮甜，口感一絕。佳哥：「炒翅最緊要動作快同夠猛火。」
3.百花玉簪鮑片$420
鮑魚片包蝦膠、鮮蘆笋蒸5分鐘，淋上蛋白汁即成。鮑魚蝦膠係絕配，蘆笋清甜口感豐富。
4.薑絲陳皮蒸南非孔雀鮑魚仔6隻$190
用果皮、薑絲清蒸鮑魚8分鐘，淋熟油、醬油即成。果皮薑絲能除海水腥味，果香為菜式增添幾分清新感覺。
5.上湯灼南非孔雀鮑魚仔4隻$198
佳哥︰「老雞、火腿、豬肉煲成上湯，將鮑魚放入上湯灼20秒即成，湯一定要滾。」堂灼做法迅速鎖住鮑魚鮮味，即食爽脆，點豉油或蠔油食又係另一種滋味。
6.鮑魚絲瑤柱撈粗麵$108
佳哥︰「呢個菜最緊要夠鑊氣！」鮑魚汁、蠔油、糖落鑊，快炒北菇絲、鮑魚絲、生麵，待汁收濃即可上碟，好夠鑊氣。
7.原隻南非鮮吉品鮑扣花膠$250
南非吉品鮑，原隻溏心口感又嫩又腍，經四大工序後慢火扣，配上煙韌的花膠，養顏補身，女生啱食。
搵食攻略
龍苑中菜廳（23151006）
地址︰尖沙嘴彌敦道50號金域假日酒店地庫1樓
營業時間︰11:00am-3:00pm，6:00pm-11:00pm
座位︰200個
人均消費︰$250-$400
註：鮑魚菜即日起供應至9月30日