張栢芝同謝霆鋒高調復合後，成日黐到實。上周六栢芝喺江蘇演出「走進陽光──讓世界充滿陽光」慈善騷，雖然佢話過唔再公開講戀情，只會專注事業，但言猶在耳，佢又講拍拖。
栢芝演出時，都係唱番陳年舊歌《星語心願》，當聽到台下歌迷高叫：「祝你們幸福。」栢芝又再高調晒戀情，佢話：「啊，你們讓我愛謝霆鋒？」佢似乎好想歌迷肯定佢哋嘅關係，歌迷又話：「你們一定要堅持下去。」
「生喺爛鬼家庭度」
對於歌迷嘅熱情，栢芝好感動，佢又笑晒咁話：「謝謝你們，有你們的支持，我們一定會堅持下去，我們一定會幸福。」為咗報答歌迷，栢芝將《星語心願》安哥咗一次，唱到歌詞「就向流星許個心願」時，出埋撒手鐧眼淚。馮仁昭覺得栢芝成日講埋啲肉麻嘢，已經令人好麻木，一啲都唔有趣。
另外，謝賢噚日接受商台訪問，佢話替霆鋒開心遇到栢芝肯為佢犧牲嘅女友。講番相士話栢芝剋霆鋒，四哥話佢哋都short嘅，仲話佢哋成日搵啲名人八字去批，批得啱就出名，批錯就做縮頭龜，佢話唔信神只係信有鬼，就係鹹濕鬼同佢呢個窮鬼，總之霆鋒遇到乜嘢都有老竇頂住咁話。
四哥又話若果霆鋒生仔，佢咪做阿爺，唔生就做番老竇。對於女兒婷婷被指係換畫王，四哥話對仔女都好慘，生喺個爛鬼家庭度，就係要承受呢啲指摘。
