呢期英格蘭嘅大紅人，一定非利物浦前鋒高治莫屬，睇佢喺歐國盃外圍賽對住安道爾場波打到曉飛兼夾連下兩城，搞到個個都睇好佢，甚至仲有人話佢可以打破英國名宿卜比查爾頓喺國際賽上累積嘅49個入球紀錄㖭，連博彩公司威廉希爾亦開出51倍嘅賠率，認為佢可以成為英格蘭史上入球最多嘅國腳㖭！
高治破唔破到紀錄就好難講，睇佢對腳又瘦又長，仲成日鍾意扭波，真係好驚佢俾人伸一腳就斷，到時真係乜都唔使諗嘞。
不過，話說高治喺嗰場波裏面，又進攻又防守，夾夾埋埋跑足13公里路程，你都咪話佢唔犀利，但原來佢有咁勁嘅表現，全賴有愛情嘅滋潤。
賽後即夜蒲真犀利
係人都知道呢位「高人」一向都唔係走花弗路線嘅球員，不過佢位樣靚身材正嘅模特兒女友艾比，之前吸毒已經非常之唔啱㗎啦，仲要成日俾人影到同其他男人「偷跳」，搞到高治戴住頂綠帽周圍走，於是乎斬纜飛鬼咗佢。
不過，最近高治身邊嘅朋友就爆料話佢同呢位「麻煩女友」復合，仲不知幾咁甜蜜溫馨，所以喺安道爾場波咪踢到曉飛囉！而且喺踢完場波之後，高治仲有體力喺夜晚同女友去拍拖夜蒲，佢有「體能王」嘅稱號認真當之無愧。
「所謂姣婆守唔到寡，雖則佢女友誓神劈願話眼中淨係得高治一個，但我求大俠就唔多信，最慘係高治咁受佢影響，容乜易到重要大賽嘅時候又鬧情變，咁英格蘭真係多得呢位靚女唔少！」