葡萄牙先攞完04歐國盃亞軍，再攞06世界盃殿軍，係咪已經高峯已過？個人認為葡萄牙仲未到頂峯，08歐國盃將會仲有一番功績。周三葡軍喺A組作客芬蘭，1.65倍W千祈咪走雞呀。文：牽牛
06年世界盃打完，歐洲列強就要準備08年歐國盃；基本上從新一輪選人新舊球員交替，都可以粗略評估列強未來兩、三年前景。瑞典、捷克呢啲就處於換血期，短期之內都不宜沾手，甚至可博一博佢哋對家，咁葡萄牙又點呢？
葡軍雙翼齊飛具威力
或者有球迷擔心，葡萄牙有費高同保列達退出國家隊，會影響好大。當然有費高呢啲有技術同有經驗嘅球員退休，對葡軍都有影響，不過葡萄牙一向唔擔心翼鋒問題，𠵱家老大哥退休，更明正言順俾基斯坦奴朗拿度（簡稱C朗拿度）同沙保沙兩個後生仔打晒，呢對雙翼齊飛威力唔少嘢。而且中場重心，應該喺廸高身上，呢位中場處於29歲大勇大熟之齡，甚至係巴塞作用不下於「細哨」，仲有文尼捷同哥斯天拿呢啲防守悍將，葡萄牙中場線未來兩、三年喺歐洲都算一線陣容。
保列達「肯」退出國家隊，葡萄牙球迷應該開香檳慶祝；呢位過晒氣前鋒，年紀大欠活力，加上大賽例腳軟，世界盃已經屢成葡萄牙「敗家仔」。冇佢霸住個位，紐奴高美斯都算把握力幾好，普斯廸加同不來梅前鋒曉高艾美達又夠年輕當打，甚至士砵亭19歲仔前鋒蘭尼，葡萄牙射手真係唔怕冇人；而且巴西教頭史高拉利肯繼續帶隊，一定俾到球迷信心。葡萄牙喺外圍賽一向都好生猛，1.65倍客勝唔好多心，捧得過。
芬蘭近10年最成功嘅外流球員係邊個？相信大家唔係講希比亞，就一定講列馬倫；不過可憐芬蘭打到今時今日，仲要靠呢兩位老大哥；希比亞走緊下坡，已經係不爭嘅事實，喺利物浦已經成日失位，芬蘭後防整體仲要冇利物浦咁掂，佢又點頂得住葡萄牙嘅攻勢。另外我都好唔明，點解教練鶴臣，仲要重召35歲嘅列馬倫，呢位老哥打到瑞超嘅馬模，仲要唔係正選個隻。雖然佢係上周六，作客波蘭幫球隊贏波外，個人仲入兩粒，不過以佢老人家，4日之內連博兩場，真係有啲吃力。其他芬蘭外流前鋒，科素叫做有波入，不過只係英冠料；布力般流浪嗰個古基，今季亦只不過後備打過一場咁大把，信唔過。
冷選塞爾維亞𡁻低波蘭
至於冷選方面，捧同組嘅塞爾維亞作客擊敗波蘭；講真波蘭同塞爾維亞，喺世界盃都失望而回，不過睇到塞爾維亞有心重拾昔日光輝；塞爾維亞搵來西班牙教練基文廸執教，呢位仁兄帶過西班牙國家隊同畢爾包，出名紀律嚴明，只要班塞爾維亞球員生生性性，真係唔講得笑。波蘭雖然都搵到比赫加接手，不過始終人腳唔突出，主場都可以輸得俾芬蘭。以塞爾維亞作客都可以炒捷克，主客和客勝2.65倍要得過。
投資特攻隊金句
老大哥退休，更明正言順俾C朗拿度同沙保沙兩個後生仔打晒，中場重心應在廸高身上，仲有文尼捷、堤亞高文廸斯呢啲防守悍將，葡萄牙中場線未來兩、三年喺歐洲都算一線陣容。