噚日港大開學，今日輪到浸大。開學禮由校董會副主席王英偉主禮，而由於今年係大學50周年金禧紀念，所以首次頒授榮譽大學院士，一共有七個人獲得：廣義和船廠董事長馮燊均、和富慈善基金贊助人李吳劍鳴、力寶副主席李宗、古琴家蔡德允、金城營造主席王錦輝、中華基督教青年會總幹事易嘉濂同埋音樂家葉惠康。
浸大今年收咗千四新生，由於要準備四年制，所以教師同校園都要擴充，現在正同教資會傾緊攞地。
大家都知香港土地珍貴，呢一樣就要睇吳清輝校長能耐，聽講佢哋有心趁李惠利學院搬去將軍澳而要咗佢幅地，但係就算得，都要應付城規會嘅高度限制，你話唔准起得高，有地都冇用。