跑步、舉重、踩單車……𠵱家做乜運動都話要有儀器輔助先得。卒之，本來需要汗流浹背嘅Outdoor運動，現時歎住冷氣、匿喺間房一樣辦得到！不過唔係人人都咁諗，好似諾記啱落場嗰隻Sport5500，聽個名就知佢專攻運動，再玩得專業啲，原來仲具備計算步速、距離，兼做埋教練幫你KeepFit㖭！加埋好耐冇出現過嘅三防式設計，直頭落雨天都照跑可也！
記者：陳國輝
攝影：陳偉強
ImageGirl：Neyuna
自從好耐之前嗰款N5140之後，諾記一直未出過三防手機。今次，Sport5500雖然話具備防水點、防震及防塵呢3大特色，然而路線卻走上運動風格，好似係流線型嘅機身設計，以及部份面殼均裝上鋁金屬物料等，呢啲都係之前嘅三防機所缺乏嘅！除此之外，諾記仲首度添加「一拍操控」呢項另類玩法，使到Sport5500唔只啱戶外人士，仲好適合時下年輕玩家㖭！
擺動機身碌波波
食正收身熱潮未減，Sport5500都可算出得啱時間！皆因佢最Fit運動人士之處，就係機身內置咗4方向平衡感應器，只要將手機掛喺身，無論你行路、跳、跑，感應器都能夠幫你計算出步數、距離以及時速等數據。就好似一部流動跑步機咁玩！令人覺得更Pro嘅係，當未正式啓動運動功能之前，你仲需要Set好個人設定，包括心跳速度、運動類型、身高以及年齡等資料，從而令數據更加精確。靚女Neyuna就即場測試過，佢將手機分別掛喺腰及頸上進行跑步運動，結果發現，原來掛喺腰係計算得準確啲喎！
另一項更過癮玩法，就係Sport5500內置咗兩款唔使用方向掣操作嘅遊戲，包括《3DWakeboard》以及《寶石迷宮》。究竟係點玩？原來，你只需要當手機係一個平面，然後不斷向前後左右4邊傾斜，咁就可以取代方向鍵嚟用，難怪試玩嗰陣，Neyuna玩到個身左搖右擺咁投入啦！
搞鬼！手指一拍轉色轉分唇
平時想切換功能，要㩒幾個掣先得，過程煩複；呢次Sport5500大玩「一拍操控」，只需拍Keypad兩下，即變色兼換功能；再拍機身左右各兩下，仲可以揀歌㖭！
落雨沙灘一樣得
話明專攻運動人士，外觀設計又點似得一般手機咁兒戲呢！除咗剛才提到嘅底面金屬殼，查實鍵盤位、機身兩側、機頂以及機底，都分別落齊晒防水物料，將部機包到好似密實袋咁安全，再加埋背脊機殼已經Lock到實一實，亦唔使擔心電池位會滲水，搞到燒機咁大鑊！但係防水唔等於可以浸落水，一浸便即時報銷；若然只用嚟應付落雨天跑步需要，仍然綽綽有餘！而另一最啱戶外用途，係機頂配備一盞白燈電筒仔，㩒住「＊」掣兩秒就會開啓，當行山時面對陰暗嘅落雨環境，最能派上用場！
PROFILE
制式：GSM三頻
屏幕：26萬色芒
通話時間：240分鐘
備用時間：240小時
主要功能：S60平台、200萬像素相機、一拍操控、運動訓練、音樂播放、microSD記憶卡、藍芽、三防、電筒照明
體積：107×45×18mm
重量：104g
查詢：Nokia（21366338）
