港股連續第5日上升，恒指又有90點進賬，日中的17538同收市17513，都係今年新高，期指仲高水20點。後市睇好，但短期整固一下仲好，只要守穩10日線同20日線，整固完成後，可向18000點大關推進。
內地房產股上升層面開始擴散，落後股發力，中新集團（563）一升就11%，其他如保利香港（119）、東方有色（230）、上海置業（1207）同上海證大（755）等都有進賬。越秀投資（123）收1.49元，升4仙，成交大增，但睇勢仲係俾芬佬㩒住收貨。不過，房產股大勢咁強，芬佬㩒唔㩒得住都成問題，一衝破1.5元阻力而又高收，就要追入，中線睇1個開。
金威集團（910）終於出現拋離式嘅升勢，收0.56元，升4仙，成交亦大增到8600多萬股。由04年10月開始，金威走勢形成一個大圓底，上月衝破0.4元阻力，開展中期上升大浪，初步上升目標係0.7元。
創富生物（340）氣勢如虹，高收1.09元，再升0.15元，升幅16%，成交更大增到2.25億股，睇盤路，隱約見有基金上車，佢哋𠵱家埋位，睇幾多？有貨在手者，可繼續上移止賺位持有。
大成交配合升勢
創富之後，輪到邊隻？華基光電（155）噚日就大升18%，成交仲大增到6700多萬股，睇勢就啱啱先破位，好大機會成為創富第2。
華基已變身成為香港唯一光電能源公司，今年5月中高價1.03元，其後大幅回落到0.5元，牛皮整固3個多月後，噚日捲土重來，升勢一發難收。
華基係基金股，小甜甜亦揸住5%。噚日華基突然發力，主要係有消息話股價會上番1元水平，仲話好快會見功。
郭兆誠