孫柏文記得，當年仲係一個喺花旗國讀書嘅大學生時，有一晚，因要為第日嘅社會學科sociology考試準備，所以就諗住通宵讀書。讀書讀到大約凌晨3時，我個韓裔同房就帶三分醉意回房，跟住佢撻上沙發椅打開電視機睇電視。大家可能會問：「咁樣唔會打擾你讀書咩？」會就一定會，不過，因為當年我都經常喺我同房考試前夕，用同一方法打擾佢讀書，所以當係報應。
講到尾，如果我有認真讀社會學科嘅書，根本唔需要臨急抱佛腳，就算冇人打擾我，考試前夕先至通宵讀，都反映咗我當時嘅讀書態度，態度就係「社會學科，讀又死、唔讀又死」。
正當我諗緊考試「肥佬」嘅後果時，個同房用帶有濃烈韓國口音嘅英文，突然大聲嗌：「Horeyshit!PakMan，youhavetorookatthis!」（嘩勁！孫柏文，你一定要來睇睇！）我當然即刻衡量究竟讀書重要，定係睇電視重要，經過片刻掙扎之後，我就即刻撲出客廳，睇吓同房究竟睇緊乜。
原來，電視播緊個關於大自然嘅節目。節目主持人係個澳洲番鬼佬，記得當晚，我見到佢赤手空拳、單人匹馬，攬實隻鱷魚打摔角。我就係咁，變成呢個番鬼佬SteveIrwin（歐文）嘅忠實fan屎。自此之後，我一路都有斷斷續續咁睇佢嘅節目，而我最欣賞佢嘅地方，就係有時佢都會出錯，被動物咬傷，大嗌：「Crikey，I'vebeenbit。」（慘啦，被咬親。）不過出錯嘅片段都會播出街，令到我覺得佢都係個凡人，只不過係個好勁嘅凡人。
身手不凡也遭殃
所以，噚日聽聞佢44歲就魂歸天國，我都即刻覺得天妒英才。不過聽埋佢嘅死因，我就有少少愕然，心裏面諗：「唔係嗎？佢喺海中心被毒魚刺死？一個被人稱為『鱷魚先生』，一路以來都只會喺陸地上同大鱷搏鬥，最多只會喺河中被咬親嘅人，點解會喺海中心同啲毒魚一齊？」
歐文先生嘅死，我哋可以一路哀悼，一路從佢嘅選擇同後果吸取投機教訓。歐文先生自小已經同大鱷搏鬥，90年代初開始有自己關於鱷魚嘅電視節目，不過可能因收視問題，就「愈玩愈大」，開始拍攝一啲同鱷魚完全無關嘅節目。就算一個人更身手不凡，始終都會遇到一種「會令到出事」嘅動物，被迫踏上不歸路。
投機買賣都係一樣，一個人可能對一種投機、賭博項目例如股票、樓房、債券、外滙、跑馬、賭波等等都瞭如指掌。不過這並唔代表因為你賭股票叻，就可以喺外滙市場叱咤風雲。所以如果你想開展另一種投機項目嘅時候，就要非常小心，特別係如果你賭開嘅投機項目到「冇得炒」或者「好難炒」嘅地步，例如97年之後嘅特區樓房市場，如果冇把握，就不如完全退出投機行列，做好功課先至再出擊炒其他嘢。
孫柏文