大熱天時食大牌檔好難頂？中大電子工程學系4年級生Angus唔係咁諗：「記得一年級入學玩OCamp，第一次去火炭工業區幫襯大牌檔，係呀，嗰晚食消夜係熱到成身汗，但大班人邊玩邊食，氣氛都不知幾熱鬧，好開心㗎。」就係OCamp嘅美好回憶，令佢同唔少中大人都鍾意聯群結隊去大牌檔食消夜，咁多檔之中，Angus最鍾意「泰源」：「有時夜麻麻無嘢做，就會約同學仔出嚟食消夜，有時候就叫外賣，『泰源』最好味，服務又好，送外賣嚟中大只不過收多$50，搭的士來回都要成嚿水啦。」
採訪當晚，雖然見『泰源』一個二個夥計粗粗魯魯，不過佢哋確實醒目好招呼，最緊要仲係夠平，Angus好友Ki話：「平日嚟食每人都係夾$30多啲之嘛，大大碟食到勁飽，套餐$380有8個小菜，仲送多個雞粥同小菜，抵到爛呀。」計我話，大牌檔啱晒成班朋友吹水慢慢Hea，價錢平係Bonus，成班朋友一齊食飯就夠開心喇。
記者：黃若茵 攝影：譚盈傑
豉椒炒蜆$45
Angus：「炒得好惹味，洗得亁淨無沙，少少辣送啤酒最啱。」蜆肉比想像中大隻，大牌檔食到如此肉厚多汁嘅炒蜆，驚喜。
椒鹽九肚魚$45
Angus強力推介：「我鍾意食九肚魚，蘸醋食仲惹味。」椒鹽炸得脆薄，咬落可以食到嫩滑魚肉，果然係好介紹。
蠔餅$48
Angus：「蠔餅炸得好靚，唔會太燶太亁，外層脆脆哋，入面仲保持到蠔嘅肉汁鮮味，落足料有好多蠔仔。」
泰源（26973656）
地址：火炭東熟食市場9E