喺香港搞財經新聞網嘅神州資訊，舊年成立咗間姊妹電玩公司神州奧美，雖然都係何晨光揸fit，但阿妹勁過家姐多多聲，一年內已經有九成單機遊戲版權，搶到近億用戶。噚日又用660萬美金，攞到韓國人氣軍事網絡遊戲《SuddenAttack》嘅10年中港澳獨家專營權，中文譯名係《突襲OL》，超騎呢。奧美仲好雄心壯志話，打算洽購一支美國遊戲開發團隊，三個月內會有公布。
不過，網絡遊戲嘅「安全」問題幾令人擔心，華華個姪試過俾人偷晒兵器，奧美就話佢哋研發嘅「神通卡」會即時記名，唔驚俾人盜用，喺內地年底會發行至500萬張卡，明年增至2500萬張咁話。
睇番神州資訊嘅年報，佢喺02年上市咁耐蝕足咁耐，今年3月埋單全年又蝕626.1萬元，五個年度總共輸成1683.4萬。不過隻股近排有異動，噚日股價升至2.76元嘅歷史新高，同年初嘅低位0.244元，足足有10.31倍，唔知係咪借網絡遊戲炒上呢？