H股喺低位打躉成個禮拜，昨日終於發難，H股指數成支大陽燭頂穿7000關，睇嚟最少仲有幾百點升。
恒指升咗90點，但大藍籌都冇乜大變，似乎要睇吓美股點走先郁，昨晚美股休市，睇嚟今日啲藍籌股都會悶啲。
交行C輪4992：招商銀行（3968）招股，交行（3328）有動作，睇番幅圖，股價幾個禮拜前俾人壓咗落嚟，跌穿50日線橫行，有明顯嘅收集手影，原來係等招行招股才發動攻勢，昨日抽上5.05元收市，單日成交急升至4.78億元，動力唔簡單，𠵱家破咗20日線，將會試5.18元，破埋位就睇5個半。交行C輪4992昨日收47仙，仲有3個幾月先到期，溢價4.51%唔算高，槓桿率10.7倍（有效7.2倍），引伸波幅29.5%，對沖值0.67，應該幾好炒，正股上試5.18元，4992料見56仙，正股升上5.5元，隻輪應見8毫子。5毫子樓下買入，正股落番4.96元樓下止蝕。
國壽C輪3889：國壽（2628）係今年反覆上升嘅大強勢股，每次調整嘅幅度都唔大，早前跌到20日線又有買盤趁低收集，昨日升番上10日線樓上，報收13.98元，睇嚟又想創新高，如果升破14.22元，應該會炒上去15元嗰頭，短炒可諗吓隻C輪3889，昨日收1.98元，仲有73日先到期，槓桿率7倍（有效5.65倍），雖然唔算大，勝在對沖值高（0.8），正股升上15元，3889應可升上2.8元，現價買番啲，正股跌穿13元止蝕。
俊樺