近排中電接連創新高，噚日仲升到50.25元的歷史新高，大家好似完全唔記得08年後有個電力改革咁滯。不過，大家喺慶祝股價創新高嘅時候，居然有8%中電股權易手。
華華睇交易所股權變動資料發現，有一名叫做WhittleDeborah嘅女子，喺上個禮拜將1.99億股中電轉手，但無每股售價，以昨日50.25元市價計算，差不多值100億元。
嘩！成100億銀喎！差不多係噚日三分之一港股成交！華華即時將呢名女子起底──佢中文名叫麥詠濤，是一位藝術工作者，一直協助推展以香港學生為對象的藝術計劃，並在02年加入嘉道理農場董事局，係農場奠基者羅蘭氏嘅孫！
照嘉理道族譜數，呢位麥詠濤大小姐，就係中電主席嘉道理嘅外甥女，佢老公叫做JasonHolroydWhittle，中文名叫韋志滔，啱啱喺5月加入中電財務及一般事務委員會；麥詠濤嘅阿爸就係嘉道理姐夫，即係中電非執董麥高利。咁點解佢咁大手貨，突然就咁冇咗？唔知係咪財富重新分配呢？下次有機會問吓佢先知！