大家又有機會抽獎，計劃22號上市嘅招商銀行，噚日喺四季酒店搞路演、見機構投資者，大批傳媒一早收到風，派晒重兵駐守，之不過因為規條所限，華華同一眾傳媒都不得其門而入，惟有喺門口死等，博有一個半個高層人有三急，傾番一句半句。
結果，路演開波之前，招行董事長秦曉同行長馬蔚華都先後「有需要」，行出會場巡咗一巡，咁大個目標露面，即刻引起騷動，搞到有人跌低，場面幾混亂，最後要勞動主承銷商之一UBS瑞銀嘅阿頭Rodney賀利華出手，先控制住場面。
華華雖則無得入場，但都八到多少料，據講司儀隆而重之咁介紹秦曉，話佢03年喺劍橋攞咗經濟學博士銜頭。在中資話事人當中，一等學府博士學歷嘅唔多，當然要特別推介！
跟開國企嘅人都熟知秦曉鍾意講嘢，對傳媒嘅態度又親切，所以記者一見到秦董，都捉住佢講兩句，佢亦好有禮貌咁話「等陣先講」，點知到完場佢就改口風，變成「下次先講」。華華都理解嘅，𠵱家要跟足條例封口嘛。