中國鋁業（2600）近一個月內兩度調低氧化鋁價格，累積減價32.74%，多家證券商調低中鋁未來盈利預測。
隻股上月大部份時間喺5蚊附近橫行，月底本來發力擺脫悶局，點知一公布減價，股價上星期五即逆市下挫，好彩噚日彈番些少，報收5.45元。
呢隻股一向有唔少捧場客，近日股價雖然忽上忽落，但無損佢哋嘅信心，「香港討論區」內，網友BILLYCCC話：「各大行唱衰中鋁，等散戶怕入市，早前升吓跌吓，散戶已是驚弓之鳥……（大戶）今早要買貨前，再來一個大震倉，散戶怕怕，大戶就可開始入貨」。
50005就認為，「2600是隻好股……前陣子大行一同唱好，但因為太多散戶高追，股價升得太快，大戶只好又齊齊唱淡，但好股始終是會有好前景的，再跌再買入，根本不用怕」。
再挑戰6元阻力
睇中鋁日線圖，保歷加通道上月尾收窄後撐闊，成交配合，MACD止跌向好，由6月中至今，做咗3個底，反彈雖然受制5.80元，但經過呢幾日嘅震盪，仍然守得住保歷加中軸，配合埋中資股嘅氣勢，短期應可挑戰5.80至6元阻力，去到呢個位，多數有整固，如果有貨喺手，不妨繼續揸，睇吓稍後會唔會破位。
余文