民建聯主席馬力因舊病復發要長期留喺廣州療養，大家都叫佢要以健康為重，黨務為次，至於立法會工作則盡力而為，啲同僚都唔會怪責佢。
香港人最好人，冇人會趁馬力病叫佢落台，但係呢個世界都係有規有矩，如果馬力真係太耐冇法子回港履行議員嘅職務，民建聯被迫要面對現實。八方聽聞，馬力應該可以捱到換屆，因為佢若然中途退出要補選，佢個位分分鐘又落喺泛民手上，要攞番就唔易。
至於黨主席個位，早前有人傳可以由曾鈺成接番，不過，校長有意問鼎問責高官，即係唔做黨主席啦，如此一來，左霸王劉江華就有機可乘，唔怪得有人提八方，佢喺截聽條例表現得咁出位，就係要向中方交心，敢公開踩泛民，主席都有得佢做。