好多人都聽過「一卡傍身，世界通行」，但對呢句說話「感同身受」嘅，睇怕冇乜人拍得住恒生總經理梁永祥。
話說三十二年前，梁永祥啱啱入讀浸會英文系，但係家境唔算太好，所以課餘要搵兼職幫補學費同開支，有個朋友知佢想搵工，於是就介紹咗佢去美國運通當夜更。
梁永祥話，家吓信用卡全電腦操作，但以前仲係全人手，有人簽卡，商戶要查code嘅時候，就打電話去客戶中心，再由職員查核資料，佢當年就係做呢啲工序；佢記得每個月返120個鐘，日日都返咁滯，到考試先會請幾日假，月薪800幾蚊，唔止要養自己，仲要幫手養屋企。
雖則份工幾辛苦，但令佢明白信用卡實務運作，又早人哋幾年有社會經驗，畢業之後直頭唔使搵工，繼續留喺AE，之後轉去渣打同恒生，一路平步青雲，呢啲咪就係先苦後甜囉！