好注重飲食健康嘅Wincy前幾日又帶自己煮嘅茄子飯返嚟，仲問我哋有冇興趣，大家一望碗嘢，都好有禮咁話：「你自己都唔夠食。」不過，當佢攞兩排朱古力出嚟，大家搶嚟食，因為包裝紙大大隻字寫住「99%純可可」，Wincy話：「啲人話純朱古力健康嘛。」
「好苦呀！！」當大家將黑朱古力放入口，office就充斥住慘叫聲。同脂肪係世仇嘅Vivien竟然話：「雖然好苦，但ok喎，食黑朱古力冇咁易肥嘛。」/(@_@)\
黑朱古力真係咁好？我將呢排朱古力，同放喺櫃嘅一般朱古力比較，竟然發現兩種朱古力嘅卡路里、脂肪含量係差唔多！我即刻打電話畀家庭醫生關嘉美。佢解釋，純朱古力雖然冇牛奶嘅動物脂肪，但可可本身有植物脂肪，雖然比動物脂肪健康啲，但一樣會食肥人；食得太多，植物脂肪一樣會變膽固醇，「唔好以為黑朱古力，可以食多啲！」但咁難食，食得幾多。
佢話無糖朱古力啱糖尿病人食，仲話食適量嘅可可，有助心臟健康，仲會令人心情興奮。已婚婦人暉女聽到，眼前一亮咁講：「係呀，啲人話朱古力有催情作用；99%純可可？好催情喎！」我哋即刻送咗排朱古力畀佢攞返屋企。//(^o^)\\
逄周一至周四刊出