日本駐港總領事北村隆則出名活躍，城中大大小小嘅社交活動佢都畀面出席，八方記得最後一次見佢就係喺馬場，佢同肥龍一齊拉頭馬。
最近就收到佢離任嘅消息，北村7月已經離開咗香港返日本，佢喺離任祝詞中話，自己喺香港嗰兩年零三個月工作愉快，喺香港同澳門識咗好多本地嘅英才俊傑，非常高興。佢返日本休息一陣，下一任務會去希臘大使館做大使，至於接佢做駐港總領事嘅佐藤重和，就會喺本月到港履新。
北村嘅英文好好，而且平易近人，又成日喺山頂官邸搞各樣活動，可惜佢駐港期間中日關係緊張，冇機會畀佢大展拳腳，但係佢都盡力而為，成日去大學演講。八方祝佢新職愉快！