馬會上周選出陳祖澤做主席，陳南祿利子厚做董事，呢條三重彩幾乎所有人都貼中，如果禮拜日開鑼啲馬仔咁易中就好囉。
陳祖澤八方上周已寫過，陳南祿冇乜好寫，利子厚反而值得一提，因為佢比較低調。呢位希慎利家第三代，係利榮達個仔，現時同佢堂哥利定昌一齊管家族生意，一個做MD一個做主席。利子厚今年只有44歲，本來係芬佬，90年開始做希慎非執董，02年中正式加入公司做營運總監，現在係董事總經理。咁後生，將來希慎同馬會主席都有得佢做。
馬會點解咁多唔揀要揀佢？原來利子厚同馬好有淵源，佢一直支持傷健策騎協會，捐咗好多錢。去年協會開餐舞會，佢就用120萬投咗架平治S350做善事。仲有，利董事亦熱愛馬術，本身係奧運組委馬術委員會成員及香港馬術總會代表。咁陳祖澤都講明任內大事係搞好08馬術奧運，有個咁熱心又咁有銀嘅人，又點會放過呢。