香港人乜都要快，食飯都唔例外，尤其係食日本菜，硬係要一碟二碟大碟細碟又豉油又Wasabi，一次過晒冷放晒上枱先過癮，激撐日本菜嘅胡定欣（Nancy）話：「食日本菜千祈咪心急，應該分門別類分先後次序慢慢食，咁先得出真滋味。」講到懶有理論咁，姑且又聽吓佢點講？
記者：蘇振鵬
攝影：何家亮
食啱次序
1.雜錦酢沙律$45
Nancy：「記得食沙律先呀！用秘製酸酢，開胃唔怕肥。」確實足料，有蟹柳、蟹子、北寄貝、海藻，入口唔齋。
2.三文魚腩刺身$38
Nancy：「開胃咯喎，係時候食件三文魚腩刺身。」計我話計落仲好抵食，每碟6件唔使$40，每日限量供應，想食要快。
3.雜錦刺身壽司拼盤$228
Nancy：「帶子王、三文魚各4件、牡丹蝦2隻、海膽壽司、三文魚子壽司、加州卷各2件、牛油果炸蝦卷4件，份量好足，我最鍾意食加州卷。」
4.燒茄子$26
Nancy：「小食係時候登場，我推介燒茄子，鍾意鋪面嘅大量木魚絲，除咗令賣相靚啲，木魚絲同茄子味道都好夾。」
5.海老天婦羅$58
Nancy：「炸物我推介天婦羅，因為我鍾意食蝦。」攝影哥哥偷食一件，睩大對眼話：「咦？影完相擺咁耐都仲咁脆？」無吹水，我都試咗件，粉漿比一般天婦羅脆，蝦肉好爽口。
6.清酒煮大蝦$88
Nancy：「開始食濃味嘢嘞，大蝦用清酒醃過，吸夠酒味再用清酒嚟燒，勁在酒味唔會太勁，好惹味。」大頭蝦蝦膏豐富，肉質彈牙，無得頂。
7.牛肉火鍋$50
Nancy重點推介：「個湯好甜呀，材料好足，又有我最Like嘅黃芽白，每次幫襯都必叫。」無介紹錯，湯底味道好濃，因為廚師加咗鰻魚汁、海鮮汁嚟調校，牛肉都好新鮮。
由淡味食到濃味
港人Like日本菜，貪佢款式多多一碟二碟食得過癮，其實食唔同類別嘅日本菜，都應該有先後次序，Nancy話：「簡單啲講，應該先食味道淡同凍嘅菜式，例如沙律咁喇，先食可以開開胃，之後食刺身，然後到壽司、小食、炸物，Last食火鍋，咁就最能夠食出日本菜真正味道。」聽落有道理，話晒凍嘢多數開胃，先食淡味菜式，味道就唔會俾之後嘅濃味菜式掩蓋喇。「食刺身都有先後次序㗎，先食貝類，再到魚類；食魚類刺身呢，就要由淺色食到深色，因為深色嘅魚味道一定濃啲，即係先食吞拿魚、油甘魚，Last至食三文魚。」
放題一樣有質素
Nancy激撐「千賀」，同老闆娘施小姐Friend過打Band嗰隻，「讀中學嗰陣已經同屋企人嚟幫襯㗎喇，幫襯咗7至8年，睇住佢由細舖搬到大舖，就算搬咗屋，我都會特登揸車入上環捧場。」點解咁撐場？「香港嘅日本菜，要平可以好平，要貴可以好貴，但價錢抵質素好嘅無幾多間。」老闆阿群師傅有多年整日本菜經驗，話晒係自己舖頭，食物質素就更加睇得緊，佢話：「我呢度不論自助放題抑或散叫，都係畀同檔次食物，絕唔會畀次貨大家。」呢啲咪叫誠意囉。
食客有Say
搵食攻略
千賀日式餐廳（28157739）
地址：上環皇后大道中2-12號聯發商業中心地下B舖
營業時間：11:30am-3:00am，6:00pm-10:30pm
交通：上環地鐵站A2出口（近上環市政大廈）
座位：80個
最好賣：日式放題、三文魚腩刺身、牛肉火鍋