女仔鍾意行街買嘢係事實，而女仔有一手好廚藝亦好應該，但唔知幾時開始，年輕女子話識煮飯甚至鍾情烹飪，好多人都會投以懷疑眼神。「行孖咇」版第一日，我哋搵嚟2R向讀者們介紹佢哋平時至愛蒲點時，第一個答案居然係鵝頸橋街市買餸！聽到後反應係懷疑：「吓？2R識得煮飯嘅咩？唔似喎，係咪真㗎？」不過當佢哋出到街市，見佢哋揀菜揀肉都有板有眼時，小記真係要為之前嘅懷疑而道歉！
記者：黃藹瑩
攝影：陳盛臣
髮型：Wing@HairCulture
服裝提供：Ztampz
2R到鵝頸橋街市，其中必到之地就係堅記鮮果店。一去到呢檔生果舖，小記立即忍唔住掩鼻，因為聞到最憎最臭的大樹菠蘿味道，點知一望Rosanne同Race兩個，竟然已問緊果檔阿姐價錢，二人面上流露出開心興奮的神色，最後用$15買咗一Pack。由於之前出席完Function就立即趕嚟銅鑼灣影相，兩位雖然慣咗「煉仙」，但肚餓起來，兩人竟即刻喺街上食起大樹菠蘿，Race見小記面有難色，奇怪咁問：「馬來西亞嘅好好味，大樹菠蘿先至係果王呀，阿姐都唔係成日有得賣。你食嚿啦！」（多謝晒先！不過都係No啦！）
2R買餸3大熱點
揀排骨煲肉骨茶
講到煮飯買餸，家姐Rosanne明顯叻過Race，不時教記者點煮點揀，表現雀躍。「我由細到大都好鍾意行街市，喺新加坡時都會陪媽咪買餸，Race怕街市濕𣲷𣲷，所以比較少行。」Race：「Rosanne好鍾意自己煮飯，尤其係飲湯，佢每日都要自己煲湯水，所以我成日都有靚湯飲。」一講到煲湯，Rosanne又再興奮起來，問我：「你有冇飲過新加坡的肉骨茶？識唔識整呢？我教你！」（算啦，記者煮食天份係零，無謂浪費材料啦！）
靚菜心白灼最好
有肉自然要有菜，Race兩姊妹要上鏡，要KeepFit全靠自己自律。Rosanne：「每餐唔會食得太飽，平日唔出街都會選擇喺屋企煮，自己煮當然煮得清淡啲，唔會太油膩。」菜係KeepFit人士至愛，亦是2R的主要食糧，Race：「其實我哋兩個好為食，街邊檔又好乜都好，都鍾意食，但要KeepFit，有時一日得一餐，夜晚又唔敢太豐富，好易肥，只有食菜唔怕肥。」Rosanne手執菜心話：「食菜都最好係灼嘅，炒就太油膩，要食少啲。近期菜心都OK，唔加油灼熟食都好甜好好味。」（做明星真辛苦！）
「鵝頸橋叉燒平過中環」
香港除咗有蛋撻同絲襪奶茶外，叉燒一樣受歡迎。新加坡長大的2R最愛食，Race：「冇一個地方嘅叉燒係比香港好食，所以我喺香港就一定成日食叉燒。」Rosanne又再以佢買餸專家的角度同我哋講：「香港有好多地方都有好味的叉燒食，不過嚟到鵝頸橋街市就要試吓利豐燒臘，唔只好味，買$15已經好多，比中環抵食好多。」
登龍街醫肚 食車仔麵
銅鑼灣對二人嚟講絕不陌生，分分鐘熟過你。佢哋兩個話成個晏晝都冇食過嘢，要搵啲熱食醫肚，登龍街內的新記車仔麵就係佢哋的目標。Rosanne：「今晚我哋要排舞，所以都唔可能食太多，不過我最推介呢度啲咖喱魚蛋。」
新記車仔麵
銅鑼灣登龍街49號地下B舖（25735438）
最平之選：渣甸坊女人街
2R每季的置裝費最少過百萬，所以平日行街買衫都盡量愛掃平貨。Race：「買貴衫就一定會揀襟興款式，可以多着幾次，有太明顯的花就唔可以交換着成日着，好浪費。我最近睇中咗對Chanel長Boots，款式唔算係襟興款，仲考慮緊。一啲普通嘅打底衫、襪，我哋都寧願去女人街買平貨。」
