資深股票客戶謝太：喂Karen，尋日同舊同學食飯，講起買股票，佢叫我留意494利豐。話利豐呢排升得好勁，應該仲有得升。你覺得點？
年輕貌美經紀Karen：利豐股價真係好犀利，由6月尾嘅約$15，升到上個禮拜五嘅$18.72。不過，利豐5月初係差唔多$20，𠵱家只係追番跌咗嘅股價。利豐股價大上大落，如果謝太你想買利豐，首先你要頂得順大升大跌嘅刺激。
謝太：呢個唔係問題，最緊要係利豐本身買唔買得過。
Karen：其實，我本身都好鍾意利豐，盈利增長好快，管理層又做得好。佢本身做貿易生意，用佢哋做得好好嘅供應鏈控制，幫想賣產品嘅公司盡量壓低成本。例如，做一件成衣，原本一間公司乜嘢都係一個國家做晒，為求減低成本，搵利豐幫手，利豐就會研究產品嘅生產過程，可唔可以分拆，例如孟加拉有最抵買嘅拉鏈，印尼有最抵買嘅布，中國有最高競爭力嘅車衣工人，利豐就會從該些國家買進原料，幫佢哋啲客減低成本。
謝太：全球一體化係大勢所趨，利豐生意應該愈來愈好做。
Karen：係就係，不過今次世貿會議完全流產，長遠來講對利豐構成威脅。不過始終都係長遠嘅問題，短期應該唔會影響利豐股價。
謝太：咁利豐買唔買得過？
Karen：謝太唔好買利豐。香港投資者一向當利豐係一間代表美國消費者意欲嘅公司，美國樓市正在跌，消費意欲就會跟住跌。利豐本身都唔平，一蚊利潤都要成差唔多30蚊去買，即係市盈率差唔多30。美國消費者有甚麼風吹草動，利豐股價就會大跌。今年5月，聯儲局只係對通脹態度強硬小小，利豐就跌咗25%。如果今年聖誕節，美國消費者「罷工」，利豐絕對有可能跌一半。5年前發生嘅9．11恐怖襲擊事件，當時利豐就由十幾蚊，跌到得番五蚊，原因就係驚美國消費者「罷工」。所以，如果再有多啲關於美國樓市嘅負面消息，利豐股價就會岌岌可危。
謝太：咁真係唔好買。