美股拉鋸咗幾日，冇乜動靜，但上周五杜指突然衝破11400，滿足咗好友的期待，亦帶嚟新局面。
大家都知，每年臨近10月，人人都諗定10月股災或會再出現，這種諗法已是年復年的習慣，冇辦法啦，以前試過咁多次10月「冧市」，股民受過咁多次創傷，這個夢魘點會咁容易擺脫，大戶睇準呢點，通常9月同10月都會搞啲嘢，𠵱家睇嚟，今個月炒高嘅機會較大，再等10月質番個市落嚟玩過。
中鋁C輪2164：中鋁（2600）前個禮拜由低位反彈，初頭氣勢都幾好，不過升得急，高位有阻力，短線獲利盤增多，上個禮拜五裂口跌番落5.36元收市，不過，跌至20日線見啲買家湧晒出嚟，用大成交造支「倒轉錘」證明佢哋對隻股票嘅信心，股價今日應該可上番10日線樓上收市。隻中鋁C輪2164上日收29仙，仲有99日先到期，溢價15.1%，槓桿18.5倍（有效7.3倍），引伸波幅41.7%，對沖值0.39，成交大，啱炒。正股上番5.70元，2164應該高過42仙，31仙樓下買入，正股下破5.26元止蝕。
恒指C輪3823：港股今早多會隨美股炒上，但17500關阻力唔小，穩陣啲可遲啲先買恒指C輪，但諗到有啲窩輪「搏擊手」可能想早啲入市，介紹隻3823畀大家，仲有87日期，溢價3.4%，輕微價內，有效槓桿15.1倍，恒指破關有爆炸力，數據又幾穩陣，恒指破關，上望17700，隻輪可升上20仙（現價16.7仙），恒指跌穿17300，止蝕。
俊 樺