花旗國近年都被能源問題煩擾，孫柏文覺得其中一個最大問題，肯定係花旗國用太多石油。全球每日石油產量都有八千幾萬桶，而花旗國就用大約四分之一，二千幾萬桶，大家要記得，花旗國人民只係佔全球人口5%，所以花旗國人都真係要檢討自己用能源嘅方法。
當然，人始終都係賤，唔見棺材唔流眼淚，就算話為「國家安全」、「保護環境」等等崇高理念作為理由去節約能源，大家始終都係「睬佢都儍」。要到今時今日，全球經濟起飛，大家都去搶能源、石油用，令到價格大幅飆升，花旗國先至有決心檢討用能源嘅方法。所以孫柏文作為一個前石油分析員兼環保分子，見到能源價格節節上升，多少有點安慰。
不過，我哋始終生活於一個石油碳氫化合物（Hydrocarbon）推動的世界，所以就算花旗國檢討用能源嘅方法，都要盡量避免影響人民已經習慣嘅生活模式。咁其中一個可以減少用石油，不過又唔需要改變生活模式嘅方法，就係搵石油代替品。
呢排，花旗國政府就開始落實「代替石油」嘅政策，其中一個板斧就係將酒精加入電油裏面。酒精當然有好多種，加入電油嘅，係大家都熟悉嘅乙醇ethanol，亦即係啤酒、伏特加、白酒、茅台酒等等裏面嘅乙醇。大家可能會問：「可以提煉酒嘅原材料有咁多種，例如麥、米、薯、糖等等，其實係唔係都可以用嚟提煉成加入電油裏面嘅乙醇？」係，絕對可以。大家可能會再加問：「點解今時今日唔見有人用呢啲原材料去提煉電油乙醇？」其實原因好簡單，因為貴。
就算原油升到呢個位，酒精都係唔夠競爭力。唯一例外就係用蔗提煉出來嘅糖，特別係巴西蔗糖，今時今日嘅油價，令到佢哋用蔗糖提煉出來嘅乙醇價格有競爭力，所以先至有咁多人去炒「糖」。
慳咗等於冇慳
不過，正當世界充滿「可以有一個代替石油又毋須要改變生活模式」嘅希望，花旗國傳來一陣陣壞消息，令到我隻金手指充滿血液，好唔情願咁去篤爆「糖取替石油」呢個希望。現今花旗國賣一種電油叫做E85，E85裏面有15%係乙醇，大家可能第一個感覺係：「好?！石油消耗量可以減低15%！」如果大家有咁嘅感覺，你哋就錯了。愈來愈多人發現，用E85這種電油，每公升行車里數大幅減低，即係話行同一里數，一部車就要用多好多電油。最緊要嘅係，每公升行車里數減低幅度，令到節省咗嘅15%電油，根本就冇節省過。
每公升行車里數跌嘅原因亦都好簡單，每一公升乙醇可以產生嘅能量，係比一公升電油低35%。所以就算你見到加入乙醇嘅電油，比起普通電油平，根本就冇慳過錢。所以，「糖取替石油」不是大家在尋找嘅靈丹妙藥。石油在人類生活上始終是主角。
最後，其實有一個好多人已經用緊嘅石油代替品。不過代替嘅唔係電油，而係柴油，代替柴油嘅就係大家都用嘅煮食油。聽聞，當年Diesel先生發明柴油引擎時，都係用粟米油來示範佢嘅製成品。仲有，用花生油作為柴油嘅引擎，發出嘅廢氣味，有啲似煮「炸雞」嘅味，大家如果有用柴油引擎推動嘅汽車，不妨試試，可能可以幫你慳錢。
孫柏文