中油（135）今個星期五公布中期業績，隻股由7月到𠵱家，一直喺4.125至4.89元之間橫行，上星期五收4.53元，處於待變格局。
「香港討論區」網友一招Ko話，「中油香港好堅，8-9-06公布業績後有運行」；ps2r33就話「睇番857公布嘅業績，135應該都唔差，望爆上$5以上」。
摩根大通近幾個月不斷增持呢隻股，有大行護航，本來可以加分，但另一網友fcuk2388就擔心「貨源歸邊，唔知大戶幾時散水，𠵱家入小心啲好」。
中油派完成績表後有冇運行暫時未知，但係睇近排唔少公司一公布完靚靚業績後就倒跌，都係唔好唔信邪。好似中石油（857），由8月23號到𠵱家，陰啲陰啲跌，唔覺唔覺整咗個類似圓頂嘅嘢出嚟。
其實中油張圖亦都係不相伯仲，日線圖保歷加通道由7月底起開始橫行收窄，MACD現牛熊訊號兼跌近0線，雖然小時圖有啲起色，但係向上水位唔太多，𠵱家入市，只可以博超短線，跌穿4.38元要barg。
油價近排回軟，上星期五跌穿70美元，如果穿埋68美元，可能引發技術沽盤，將對中油不利。
既然中油仲有幾日派成績表，若不慣炒超短線，不如等多陣，睇佢爆邊個方向至決定點做。
余 文