沙田新城市廣場可以話係中大學生Playground，行街食飯睇戲一個商場搞掂晒。讀中大Nursing三年級嘅Wing就鍾意去「ChocolateGarden」打躉：「成日喺學校Canteen開餐好悶㗎，尤其嗰日上天地堂（即朝早與下晝先有堂，中間大段時間無堂上），唔想成個晏晝留喺學校或者圖書館，咪嚟度歎杯花茶Hea吓囉。」
近年興飲花茶，可惜最近中大嘅沙田都無乜Cafe或者歎茶地方，新城市廣場今年裝修過，多咗7樓成層食肆，自不然成為一眾中大生打躉好地方，「嚟呢度飲花茶好悠閒，自己一個做筆記溫書，真係唔錯㗎。就算唔使上天地堂，有時約開同學仔嚟沙田，我都會一個人歎杯茶食個甜品先。」訪問完畢，Wing飲完花茶，食飽飽，問我：「不如去行街囉。」睇吓，嚟呢度食嘢，食飽仲可以行街睇戲唱K直落，難怪阿Wing咁鍾意呢度啦。
記者：黃若茵
攝影：譚盈傑
海鮮燴蜆殼粉 香草龍蝦汁$58
Setdinner包餐湯、甜品同飲品，雜錦海鮮有三文魚、蜆肉、青口等，粒粒蜆殼粉兜住勁多汁，保證啖啖香濃。
新加坡雞髀扒$42
Setlunch包餐湯、甜品同飲品，雞髀扒配椰香咖喱汁，咖喱唔算太濃，雞髀扒焗得香脆。
士多啤梨布甸配 薰衣草吉士汁$38
布甸好鬼滑，好重士多啤梨味，點伴碟嘅士多啤梨醬味道更甜蜜。薰衣草吉士汁係自製嘅，加入薰衣草香味，最啱女仔食。
ChocolateGarden（26012389）
地址：沙田新城市廣場第一期7樓704室
