話就話係銀幕情侶，但記憶中奇洛李維斯（KeanuReeves）同珊廸娜布洛（SandraBullock）好似冇乜談過情，佢兩個喺《生死時速》（Speed）入面只係各有各咁擒來擒去同揸巴士，所謂嘅愛情都只不過係結局時係咁意攬吓同咀過吓。不過唔緊要，事隔12年，佢哋終於有機會喺新戲《情流戀屋》（TheLakeHouse）中名正言順、舒舒服服咁愛一次。撰文：戶川淳
大家恨睇奇哥同珊廸娜談情恨咗12年，不過佢兩個喺新片《情流戀屋》入面又真係得個談字，事關齣戲改編自大熱韓片《觸不到的戀人》，李政宰同全智賢變晒西人講英文，呢對時空相隔兩年嘅男女，住喺同一間湖邊大屋入面，但竟然可以喺信箱收到對方嘅信，於是兩人靠書信來往傾訴心事，最後互生情愫，發展出一段奇幻情緣。
萬眾期待最佳接吻
換言之，奇哥同珊廸娜大部份時間依然係各顧各，做對手戲嘅時間仲少過《生死時速》，不過到最後佢哋都有機會攬同咀，唔係又點喺今屆Teen'sChoiceAwards勇奪最佳接吻鏡頭獎？近年珊廸娜星運麻麻，奇哥演技又停滯不前，佢兩個如果可以擦出火花，都係好事。
其實近年荷李活鬧劇本荒，電影公司紛紛改編亞洲電影，貪其平靚正，當年《觸不到的戀人》深受亞洲觀眾歡迎，加上成本平到無倫，奇哥睇過認為齣戲大有潛質，於是決定同監製拍檔DougDavison一齊翻拍。
強勁班底炮製經典
不過呢個美國版並非搬字過紙算數，為劇本執筆嘅大衞奧本（DavidAuburn）喺戲劇界享負盛名，前作《情來算盡愛》曾獲普立茲獎及東尼獎；阿根廷籍導演艾力贊杜阿加斯提（AlejandroAgresti）喺國際影展亦獲獎無數，負責美術嘅係憑《蝙蝠俠：俠影之謎》（BatmanBegin）獲得BAFTA獎提名嘅尼敦高利（NathanCrowley），班底強勁。但美國影評似乎仲未接受到「隔空筆友」呢個concept，話冇邏輯兼睇到一頭霧水，真係冇鬼用，熟悉原版嘅香港觀眾應該冇呢個問題啩！