上月有匿名人士致電報館爆男歌手尋歡，矛頭直指杜德偉，曾經一度令杜德偉好困擾，但隨住佢上台灣節目親自澄清後，呢單桃色風波已經煙消雲散，近排佢都返港重過新生活。
頻抽紅白藍上落
早幾日夜晚8點零鐘，關仁喺天后電器道巧遇杜德偉，當時佢戴cap帽、着住心口印有「THEBITCHISBACK」（潑婦回歸）英文字樣嘅T恤，同一位身形肥胖嘅男士一齊喺新釗記茶餐廳打躉食晚飯，現場見杜德偉精神唔錯，但就明顯比前消瘦唔少，拍喺佢同行嘅肥男伴身邊，就更加凸顯佢嘅身形細粒。
杜德偉同朋友開飯後，由朋友負責畀錢，跟住兩個大男人就行去清風街，喺杜德偉泊街嘅私家車度搬出一架手推車，再結伴行去英皇道一幢唐樓，原來杜德偉係幫朋友搬屋，所以到埗之後都不停上樓落樓，將六、七袋裝滿重物嘅紅白藍袋搬落嚟，前後上落樓梯都不下十次八次。
不過，大家千祈咪睇小已經43歲嘅杜德偉，雖然搬到滿身大汗，但一啲都冇索氣，好力兼快手，體力好過幾多後生仔，佢嗱嗱臨搬完之後，趁有時間仲企埋一邊「採礦」，做埋清潔工作。唔怪得之杜媽媽張露早排猛話杜德偉有潔癖，一定唔會尋歡，關仁見佢今次搬屋都不忘採礦，至知杜媽媽果然所言非虛。
