公戲私用：受害人=血腥屠夫　《輪迴》結局嚇你一驚

打從99年第一部《午夜凶鈴》開始，自問已愛上睇日本製作嘅鬼片。但此後同一橋段用完又用，欠缺新意，更差啲想將呢類「日式」電影列入BlackList！不過，啱啱返嘅《輪迴》終於有突破，佢唔單只玩盡各樣畫面及音樂恐怖元素，更估唔到嘅，係竟有出乎意料嘅結局，擺明係導演清水崇想學當年《鬼眼》嘅成功之處，再重新包裝演繹一次，睇到你滴汗心跳！

記者：陳國輝

類型：驚慄
片長：96分鐘
級別：IIB
售價：$85（DVD）/$45（VCD）
查詢：亞洲影帶（27505595）

故事講述喺1970年發生於某酒店嘅殺人事件，法醫學教授屠殺自己家人、酒店住客及職員共11條人命，並將過程拍低後自殺身亡，喺當時轟動全國！35年後嘅今日，年輕導演松村郁夫將呢件事再拍成電影，並選用杉浦渚（優香飾）擔演為教授女兒。不過，佢接拍呢部電影之後，不斷湧現35年前嘅幻覺，仲發現自己嘅前世……

■主目錄會不斷播放受害人嘅死狀，夜晚一個人熄燈睇實嚇餐飽。

■以拍攝真人真事改編嘅電影為藍本，揭開故事序幕。

穿梭前世與今生

喺《輪迴》裏面，當杉浦渚被導演選中為電影入面「最後死亡者」之後，便不斷出現好多上一世嘅幻覺，例如睇見一個手拎木偶公仔嘅小妹妹，喺佢身邊徘徊，仲話要搵佢索命；佢又喺酒店目睹35年前，自己前世遭到大屠殺嘅經歷，每一幕恍如真實；但另一方面，導演喺表達呢兩段時間上，又處理得相當出色，好似當進入幻覺劇情之後，畫面便突然有輕微雪花及淡黃嘅懷舊色彩，唔會令人睇到錯亂。
即使劇情包裝得幾靚，但係DVD包裝卻有所失色！《輪迴》並冇任何豪華精品送畀大家，最唔抵幫係連Bonus內容都冇，打開主目錄只有轉換字幕以及音響等基本設定；個人覺得，起碼都應該有導演清水崇嘅介紹，以及電影幕後製作花絮，而最唔少得，當然要訪問劇中嘅女主角──優香小姐啦！

■當優香走入事發酒店，跟住就睇見前世嘅事情。

■本來班演員喺度試緊位，點知突然拍到一幅死人相。

■當年屠夫就係用利刀插穿一名男孩嘅心臟，好殘忍！

出位Ending似《鬼眼》

仲記得鬼才導演禮切沙也馬蘭玩得好盡，佢將《鬼眼》故事故弄玄虛，欺騙咗全世界，令人以為布斯韋利士一直幫緊個小朋友，到結局先知道，原來係小朋友一直幫番佢！當然，好橋用過一次，翻炒就冇咗之前嗰種新鮮感。《輪迴》嘅情況就有啲係咁，佢試圖仿效《鬼眼》，大部份時間都為結局鋪排好細節，直至結尾，先知道優香嘅真正身世；雖然呢招已經唔再新鮮，但成功製造出故弄玄虛嘅效果，當小記知道結局之後，亦不禁要讚一讚導演清水崇嘅「騙人」才華！