好股唔怕翻兜，睇準時機，可能仲和味。FollowMe今年4月9日推介新疆天業節水灌溉（8280，簡稱天業），短短兩日，由2.275元升至2.90元，勁升27%。
天業上周收1.76元，由高位起計調整4成，又到翻兜時候。
天業基本條件比5個月前更實淨，客觀條件更有利。連里昂證券上周一都擒擒青出報告，話中國正面對50年以來最嚴重旱災，必須諗計仔解決水荒問題，天業正係得益股份之一。
里昂話正
06年度（12月年結）上半年，天業營業額2.58億元（人民幣．下同），增15%。盈利2639萬元，增4.7%。增長表面麻麻，但重要嘅係研發新產品有突破，期內完成3項重大研發：ヾ農用PVC管；ゝ共擠滴灌膜；ゞ大田灌溉系統。有新產品在手，就有新盈利來源，咁啱國內有需要應付旱災，加上國策全力支持農業與環保，新產品料會大受歡迎。
天業上半年已順利完成寧夏銷售中心與示範區工程，在甘肅亦設妥示範區，並成功開拓中亞與中東市場。
天業在行內崛起，全賴有軍人背景嘅主席郭慶人。郭氏現年63歲，58年奉召進入八鋼所屬鋼鐵學校，60年進入新疆工學院，64年分配到兵團134園場，帶領60名知青種植棉花逾10年，農務經驗豐富，成為新疆第1位以企業家推廣膜植棉花技術，將60年代由美國與以色列率先採用滴灌技術，引進到內地改良後發揚光大，成本只係外國的12%，備受中央讚賞。
天業的母公司「新疆天業集團」（滬600075），97年掛牌，現時市值28.16億元，中央政治局9位常委中，有7位曾親自視察其基地，可見重視程度。
中央全力支持農務與改善水源環境，未來5年投下資金逾1.4萬億元。天業與母公司齊齊食正條水，當然受惠。天業現價1.76元，較招股價1.18元高出唔算多，有咁嘅前景，自然令人睇見心郁。
天業年初來港上市，係第1隻A股分拆H股來港掛牌嘅H股，直接配售畀基金，其中富達、宏利環球、惠理、Atlantis、EverestCapital等均有承購。上市後曾大升1.5倍，基金有厚利在手，獲利回吐好正常。至今仍有兩大基金持股逾5%，佢哋係富達揸9.86%，DreyfusPremiumGreaterChinaFund揸7.67%。
基金睇好天業，建基於中國人口13億，佔全球人口22%，但內地水源只佔全球總量8%。正如21世紀世界水資源委員會主席IsmailSerageldin所言，20世紀為石油打仗，21世紀則要為水資源而火拼，冇水唔掂。
母公司股價升4倍
天業作為國內No.1節水器材供應商，地位吃重，盈利前景無可限量。今年預測PE14.4倍，比美國同業30倍低得多。睇20倍，天業已經可見2.44元，上升空間39%。睇圖表，4月高位回落1.26元，其黃金比率0.618倍彈幅計，睇2.54元。睇遠少少，遲吓舊地重遊，見番4月高位，升幅更達65%。
唔講唔知，天業母公司新疆天業集團，97年以A股上市至今，股價由招股價1.26元升上6.42元，升幅410%。單係去年初至今，升幅已達83%。
天業在港掛牌H股得2.02億股，市值不過3.55億元，扣除基金所揸嘅貨，街貨有限，一挾就上。
高彰坡