雖然英超只係踢咗三場波(有啲球隊可能只踢咗兩場),但我呢個小妮子都想淺談吓英超四強──曼聯、阿仙奴、利物浦及車路士喺今季季初嘅表現。
望曼聯重現霸氣
首先係曼聯,佢哋𠵱家三戰全勝,首場主場就狂風掃落葉咁贏富咸,跟住作客贏查爾頓,到上周僅贏屈福特,佢哋個個球員都幹勁十足,重現番昔日霸氣,希望可維持。
至於車路士繼續買入五星級球員,雖然好「正路」咁主場贏曼城及作客贏布力般流浪,但第二場作客米杜士堡慘遭滑鐵盧;繼上屆作客慘吞三隻光蛋之後,又一「傑作」,油王塊面唔似石油就假。
利物浦表現中規中矩,可能要分身歐冠盃外圍賽嘅關係。首場作客千辛萬苦之下迫和錫菲聯,第二場主場就僅贏韋斯咸,當中有球世界波值得回味。呢隊波一向比較慢熱,季初一條蟲,季中一條龍。
至於阿仙奴今屆英超仲未贏過,第二場作客輸畀曼城,阿仙奴班球員好似無帶射門鞋,佢哋真係要學吓中國人開工之前拜吓神。
TOBY梁靖琪
走出女生宿舍依舊人氣高企,不惜捱更抵夜睇波。