天時暑熱，係人都想搵啲水上活動玩吓。兩個俏嬌娃朋友報咗團，叫我今個周末一齊去玩浮潛，吓？我唔識游水嘅喎！「唔使識游水㗎，徒手潛水玩者只須戴上連吸管嘅潛水鏡，穿上助浮衣同蛙鞋，不諳泳術嘅都可以『浮屍』咁攤喺海面享受海洋樂趣，欣賞靚靚珊瑚。最過癮係今次玩埋放生小魚兒，好玩又有意義，一定要去呀！」咁寫意，一齊去囉！
記者：葉雪芯 攝影：何家亮
模特兒：Lalage、Tammy
鳴謝：獅子會、國際精英潛水中心
浮潛記之畀條生路
初哥蒲甕缸灣 眼看手勿動
一大早由西貢碼頭出發，乘船約一個小時，終於到達西貢甕缸灣。甕缸是西貢牛尾海眾多島嶼之一，棲息着不少珊瑚及海洋生物，是具特殊科學價值的地點；也是海下灣、東平洲以外又一熱門浮潛地。這兒的海底世界較少海刺、獅子魚之類的危險生物，適合浮潛初哥學習。怪唔得團友中不少都是一家大細有老有嫩，幾歲人仔都話玩埋一份啦！不過教練提醒，呢度人多船多，事事小心免生意外！最重要一點是眼看手勿動，不要用手接觸或傷害珊瑚、魚群及海洋生物。
裝備自己
放魚兒返家鄉 平衡生態
各位團友已經準備好晒，俏嬌娃處女下海，初時唔識用吸管，飲了一大啖海水。但飲海水都甘心，皆因甕缸灣海底有好多珊瑚，色彩斑斕，粉紅、白、青……仲有沙灘魚、水母、海參等，估唔到香港水底會咁靚！
玩浮潛兼放生才是此行賣點，教練話：魚有分平時喺街巿買到嘅食用魚；同埋睇得唔食得，如金魚、熱帶魚等用來觀賞的非食用魚兩種。香港水域因為捕魚同埋水質問題，令到海中非食用魚嘅數量愈來愈少，就算有一個好靚嘅珊瑚區，都無魚游來游去，就好似一個空蕩蕩嘅魚缸咁，生態環境不平衡，所以今次我哋就做吓好心，放生呢啲非食用魚落去呢個環保基石甕缸灣珊瑚區，等啲小魚兒可以回娘家。
「慢」游水世界
糧船灣歎游水海鮮
玩了半天，上番岸，又攰又餓，咁就梗係要搵地方醫吓肚啦！兩嬌娃決定搭半小時船到糧船灣歎游水海鮮，但我話呢頭放生、嗰頭又……誰知兩嬌娃話：「你頭先無聽教練講咩，有食用同非食用魚之分㗎。」轉個頭已登船而去。我亦終被海鮮漁村的新鮮海鮮吸引，其中最正就係泥鯭粥！泥鯭細細條，白粥軟綿綿，不知幾鮮甜。另外，椒鹽魷魚酥真係值得推介，魷魚夠鮮味，而且一啲都唔韌，炸得啱啱好，內軟外脆，食到唔停得口。仲有粉絲蒸扇貝、薑葱炒蟹、清蒸水上鮮魚……嘩，掂呀！
以為去咗湄公河？
西貢碼頭每日到下午四點左右，你都會見到岸邊人頭湧湧，個個向海下面望，望啲乜？就係海上小販囉！碼頭有不少小漁船停泊在岸邊，漁民會即場喺船上售賣佢哋嘅魚穫，仲有好多海鮮亁貨。例如蝦亁、鹹魚仔、魚亁仔、魷魚亁等等，樣樣都係漁民自家魚穫靚貨，天然生曬製造，風味又點同喺市區鹹魚欄或者街市買嘅相提並論？最大嘅特色係漁民唔會上岸，你喺岸上揀貨，揀好之後將錢放喺漁民長柄嘅魚撈入面，佢哋就會將錢撈落船，交易成功！咁樣買嘢，俏嬌娃話咁大個女第一次試，仲以為自己去咗泰國湄公河嘅水上市場㖭！
遊Guide
西貢浮潛一日遊
日期：9月17日
行程：9:00am-6:00pm（包早、午餐、浮潛、是日改玩海岸清潔）
費用：$350（成人）$250（小童）
交通：從九龍灣德福乘1號綠色專線小巴到西貢市公眾碼頭集合
查詢：23811132（國際精英潛水訓練中心）
糧船灣（有利）海鮮漁村
地點：糧船灣沙橋村11號
查詢：27911822
營業時間：10am-10pm
西貢水上市場
地點：西貢公眾碼頭對出
交通：從九龍灣德福乘坐1號綠色專線小巴即可到達