每次採訪完畢，返到上野已接近晚上11點。日本的商店通常8點就收工；所以喺11點要找地方食晚飯，真係唔容易。
當然，如果唔揀擇，日本街頭都有好多24小時營業的吉野家、松屋同老麥等等；不過日日食就梗會厭啦，所以有時都想食吓地道的日本餐。幾次入到去，發覺大部份menu連一隻中文字都冇，但經我呢一星期的考察，發覺其實唔識日文，都仲有好多選擇！
迴轉壽司抵食
首先，就係食迴轉壽司。除咗可以食揀帶上面嘅食物，你只要學吓講Toro（吞拿魚）等自己想食嘅壽司，就可以有頓豐富晚餐。而且每碟先係136日圓，港紙10蚊都唔使，抵食！
其次，就係去一啲有自助售票機，即日本人稱為食券的地方。因為大部份機上面都有漢字，叫嘅時候唔使盲摸摸，通常旁邊更有埋圖睇。最後一個方法，就係買便當。事關東京街頭好多地方都有便當盒賣，方便一啲夜放工人士，入到去直情有埋個樣畀你睇，識唔識日文都唔緊要啦！