近期鋒芝戀的高姿態，絕不遜於嘉亨戀。前晚謝霆鋒和張栢芝出巡中環歎西式fusion菜撐枱腳，其間不停耍花槍晒甜蜜。
晚膳期間，霆鋒到門外煲煙，露出手背傷痕的他對記者說：「係拍打戲練樁時，打到損晒。」語畢他突出拳擊向電燈柱，並說：「你鍊吓，練得啲肉好實㗎。」接着即返餐廳，一小時後才拖女友離場，為愛郎拿外套的栢芝說：「好耐冇嚟蘇豪，算係食燭光晚餐，入面都有口舊蠟燭。」
行錯路撒嬌
當時有線娛樂新聞台正拍攝栢芝，霆鋒卻在她身前裝鬼臉，更取去有線DV機親為女友拍攝。兩口子登車後直往男方中環band房，栢芝竟入錯隔鄰大廈，霆鋒即說：「呢邊呀。」栢芝則不依說：「我都唔熟路。」霆鋒又說：「唔熟又係咁標？」二人當街打情罵俏之後，才上樓繼續溫馨。
至凌晨三時多，穿T恤露出圓潤身材的栢芝單獨到便利店買薯片和雪糕等，其間有外籍人士上前搭訕，她與對方閒聊幾句即上樓與愛郎再擦過。
採訪、攝影：娛樂突發組
