影壇新人柔柔雖然演技麻麻，但係因為生得幾似白癡，所以都拍咗幾多廣告。早排佢同台灣高佬品神拍完電影又合作拍廣告，品神之後喺台灣發炮話佢哋傳緋聞，係柔柔夾埋公司搞鬼，仲話佢女友睇到報道後詐晒型。其實講知名度，品神喺台灣只係一般，喺香港更加冇乜人識，關仁知道套戲同廣告，其實係柔柔帶挈佢拍嘅，品神多謝都冇句仲要話人，呢啲咪叫做過橋抽板、忘恩負義囉！
虛偽阿產攝位影相
成日恃住靚仔嘅影星阿產，早排為咗谷新戲，不惜將同記者嘅電話內容放喺電影度，佢嘅手法已經好乞人憎。演藝人協會就藝人被偷拍事件日前漏夜開會，阿產都有去，當坐喺樓梯級影大合照時，本來大家諗住安排矮仔坐中間，點知阿產一句唔該就攝咗人哋個當眼靚位，阿產鏡頭前同鏡頭後判若兩人，關仁覺得佢好虛假，極之乞人憎。
文盲阿魚工作馬虎
曾經做過歌手嘅阿魚不嬲都係失魂魚，以前掛住同食丸歌手拍拖，搞到無心戀戰，結果同唱片公司解約。冇幾耐佢轉行做雜誌嘅潮流記者，以為可以有一番作為，點知阿魚繼續雲遊太虛。關仁聽聞早排阿魚公司有編輯發現佢段稿空格多過文字，阿魚竟然同編輯講：「我唔識字吖嘛！」又有次編輯叫阿魚做嘢，佢即場發爛渣話：「我新呀，你叫我做咁多嘢做乜呀？唔識喎！」阿魚外勤影相，攝影師問佢意見，佢又頭擰擰，只係話：「我點知呀？你自己諗啦。」阿魚連自己要做乜都矇查查，做嘢又遲到早退，咁嘅工作態度，唔好話做記者啦，做乜都聽炒啦！
Textby關仁