國泰行政總裁陳南祿獲選為馬會董事，可喜可賀。佢一九八七年成為馬會會員，二○○三年成為遴選會員，今年成為董事，升職甚為快速，當然係靠佢嘅雄厚背景。國泰航空咁大手筆贊助賽馬，陳南祿應佔一份大功勞，以佢嘅年紀，五十歲剛出頭，有資格在十六年後輪到做馬會主席，如果到時已經退咗休，咁就另計。始終以馬會咁大機構，搵一位已退休人士做主席，似乎壓唔住場。退休人士做馬會董事當然冇乜所謂，做主席咯喎，讓畀在職權勢人士上位，更有自知之明。另一位新董事利子厚係利希慎家族後人，呢位四十出頭嘅世家子對馬術有濃厚興趣，碰啱○八年香港舉辦奧運馬術賽，利公子正好大展所長，正是一位適當人士在適當時間於適當地方出現，相信唔使等二十年，利公子就會做馬會主席。
陳南祿搞國泰樂隊TheYoungOnce，每年辦一次聯歡，規模漸大，受商界人士注目。左丁山一位老友投資Ｒ原來對此唔係幾順氣，因為投資Ｒ與一班DBS（男拔萃）校友老早夾Band，支樂隊就係叫做TheYoungOnce，𠵱家個名俾陳南祿佢哋用咗，如果投資Ｒ再用，會俾人誤以為抄襲㖭。冇法啦，朋友夾Band，點會一早註冊樂隊名稱吖，你諗到時，人又諗到，正是英雄所見略同！
餐廳Ｒ聽見TheYoungOnce，有感而發：「我哋幾時年青過？時光如逝水，眨吓眼已經要高歌一曲OneDayWhenWeWereYoung，年青情懷忘記晒咯。」餐廳Ｒ話佢媽咪常常教訓佢哋一班兄弟：「Youngtooearly,smarttoolate」，以前唔多明白，現在逐漸領略smarttoolate之人生教訓。佢阿媽係德國裔，呢句說話是否自德國成語翻譯過嚟呢？無可稽考。總之，「士嘜」不分早後，遲啲「士嘜」，好過永遠唔「士嘜」，唉，程翔如果早啲「士嘜」。唔好咁苦戀祖國，點會蒙受牢獄之災吖！佢如果肯好似港大校友陳南祿咁「士嘜」，一畢業就投身英資大行，乜事都冇。