海域集團同海域化工兩間上市公司爆煲兼清盤之後，身為集團主席、傅明憲丈夫葉劍波一直未有露面。雖然傅明憲都，低調咗好多，但每次亮相都依然成個闊太樣，好似要俾人覺得佢完全唔受事件影響，真係闊太唔易做！
「兩個都唔錯」
前晚傅明憲以東華總理身份，喺灣仔會展出席愛心滿東華慈善晚會，着住鮮紅色低胸裙襯紅色高踭鞋嘅佢，戴住對鑽石耳環閃閃生輝，艷壓全場。不過佢成晚似乎心不在焉，笑容牽強，呆滯木獨，同以往活潑開朗嘅形象差好遠。
本來關仁想同佢傾兩句，點知傅明憲喺後門進場，到頒完紀念品，佢又避走後台，到清場先出返嚟上坐，所以都冇機會同佢嗲兩嘴。
當晚楊千嬅、周麗淇（Niki）同鄧麗欣擔任表演嘉賓，而區海倫、張德蘭夫婦及蔣麗萍夫婦等都有出席。周麗淇以新髮型亮相，講到佢同鄭伊健單緋聞，俾人話有機會變成「奪麵三『琪』」，Niki好大反應咁話：「啋啋啋，唔好亂嚟，我只當好笑新聞睇，唔想孭呢個名一世。」問佢究竟要鄭伊健定鄭嘉穎？Niki話：「好混淆，隔兩日就有緋聞，兩個都唔係，不過兩個都唔錯。」
